Оддий гол уришни билмайдиган Златан Ибрагимович фаолиятидаги энг чиройли 10 та гол (видео)

Коронавирус пандемияси сабаб дунё бўйлаб деярли барча спорт мусобақалари тўхтатилди. Шу жумладан, футбол бўйича мусобақалар ҳам. «Дарё» мухлисларнинг талаб ва таклифларини инобатга олган ҳолда дунёнинг энг кучли футболчилари томонидан урилган энг сара голларни тақдим этиб боради. Ушбу лойиҳанинг навбатдаги сонида Швеция терма жамоаси афсонаси, ҳозирда «Милан»да тўп сураётган Златан Ибрагимович фаолиятидаги энг сара голлар тақдим этилади.

2004 йил | Швеция—Италия (1:1)

Евро—2004 гуруҳ босқичи иккинчи турида Италия дастлабки бўлимда олдинга ўтиб олади ва қолган вақтда эҳтиёткорона ўйнашда давом этади. Бироқ бу ҳаракатларни Златан 85-дақиқада суперголи билан жазолайди. Кейинчалик бу дуранг италянлар учун қимматга тушади ва жамоада гуруҳда қолиб кетади.

2012 йил | Швеция—Англия (4:2)

Швеция ноябрь ойида Англияга қарши ўртоқлик учрашувда иштирок этади. Учрашувда Ибра ҳет-трик қайд этади. Унинг сўнгги гол эса шунчаки шедевр! Жо Ҳартнинг хатосидан кейин Златан жарима майдони ташқарисидан акробатик усулда зарба йўллаб бўш қолган дарвозани ишғол қилади. Шу тариқа шведлар Евро—2012 даги мағлубият аламини олади.

2012 йил | Швеция—Франция (1:0)

Евро—2012 гуруҳ босқичнинг 3-турида мусобақа билан хайрлашишга улгурган Швеция Францияни мағлуб этишга эришади. Ибрагимович эса навбатдаги чиройли зарбаси билан жамоасининг ғалабасига ҳисса қўшади.

2013 йил | «Андерлехт»—ПСЖ (0:5)

ПСЖ Брюсселда «Андерлехт»ни тор-мор келтиради. Мазкур учрашувда қаҳрамонимиз покерга эришади ва, албатта, Златан бу ўйинни ҳам чиройли голсиз тарк этмайди.

2013 йил | ПСЖ—«Бастия» (4:0)

Ибра ўйин дебютида иккита гол урган ҳолда баҳс тақдирини ҳал қилиб қўяди. Улардан бири эса «чаён услуби»да йўлланади. Мазкур баҳсда шунингдек, Эдисон Кавани ҳам дублни расмийлаштиради.

2016 йил | «Борнмут»—«Манчестер Юнайтед» (1:3)

Премьер Лига 2016/17 йилги мавсумнинг илк турида Ибрагимович узоқ масофадан ерлатиб зарба берган ҳолда меҳмонлар дарвозасини ишғол қилади. Бу Златан учун АПЛдаги дебют гол бўлганди.

2016 йил | «Манчестер Юнайтед»—«Эвертон» (1:1)

Биринчи бўлим охирлаб бораётган бир вақтда Ибрагимович Жордан Пикфорднинг хатосидан унумли фойдаланган ҳолда парашют зарба йўллайди. Тўп дастлаб дарвоза тўсини, сўнгра устунига теккан ҳолда секингина чизиқни кесиб ўтади.

2017 йил | «Манчестер Юнайтед»—«Ливерпуль» (1:1)

Златан принципиал қарама қаршиликнинг сўнгги дақиқаларида боши билан чиройли тўп киритган ҳолда «қизиллар»ни уч очкодан маҳрум қилганди.

2018 йил | «Лос-Анжелес Гэлакси»—«Лос-Анжелес» (4:3)

Лос-Анжелес дербисида дастлаб меҳмонлар учта тўп киритган ҳолда олдинга ўтиб олади. Бироқ майдон эгалари бунга тўртта гол билан жавоб қайтара олади. Голларининг учинчисига Ибрагимович муаллифлик қилади. Мазкур шедевр ўйинда мувозанатни тиклашдан ташқари, швециялик футболчи учун MLS’даги дебют гол бўлиб тарихга киради. 91-дақиқада Ибра жамоасининг тўртинчи голини ҳам уради ва АҚШдаги саргузаштларини кўтаринки кайфиятда бошлайди.

2018 йил | «Торонто»—« Лос-Анжелес Гэлакси» (5:3)

Ибрагимович яккакураш усулларини қўллаб тўп киритган ва учрашувдаги интригани қайтарганди. Дастлаб 0:3 ҳисобида ортда бораётган «Лос-Анжелес Гэлакси» ҳисобни тенглаштиришга эришади. Бироқ якунда канадаликлар яна иккита тўп киритган ҳолда ғалабани тантана қилади (5:3). Ушбу гол ФИФА талқинига кўра 2018/19 йилги мавсумнинг энг чиройли голи номига давогар сифатида олинганди.