Швеция маликаси София (Sofia Hellqvist) коронавирусга қарши курашишда ўз ҳиссасини қўшиш учун маҳаллий шифохоналардан бирида ҳамширалик қилди.
Cosmopolitan нашрининг ёзишича, шаҳзода Карл Филиппнинг рафиқаси ҳамшира сифатида фаолият юритишдан олдин Стокгольм университетида уч кун давомида тайёрлаш курсида ўқиган. Таъкидланишича, у ерда вирусга қарши курашиш учун ҳафтасига 80 ҳамшира тайёрланади.
Курсдан сўнг малика Sophiahemmet хусусий шифохонасида ҳамширалик қилган. Қиролликнинг ахборот департаменти раҳбари Маргарета Торгреннинг айтишича, ресурслар чекланган бир вақтда маликанинг ўзи вирусдан зарарланганларга кўмак бериш истагини билдирган.
София янги вазифани сидқидилдан бажаришга киришган, тиббиёт ходимлари формасини кийган ва ҳамкасблари билан танишган, дейилади хабарда.
Ижтимоий тармоқларда собиқ моделнинг ушбу мотивацион ҳаракати ижобий баҳоланиб, илиқ фикрларга сабабчи бўлган.
Маълумот учун, 2015 йилда шаҳзода Карл Филипп билан турмуш қургунга қадар малика София моделлик фаолияти билан шуғулланган.
Изоҳ (0)