Жаҳон соғлиқни сақлаш ташкилотининг фавқулодда вазиятлар бўйича ижрочи директори Майкл Райаннинг сўзларига кўра олимлар ҳали ушбу саволга, яъни COVID-19 юқтирган одамда кейинчалик ушбу касалликнинг қайталаниши эҳтимоли қанчалик эканига жавоб қайтариш учун етарли даражада маълумотга эга эмас. Бу ҳақда Женевада ўтган анжуманда айтиб ўтилган, деб хабар бермоқда CNBC.
«Тўлиқ тузалиш ва касалликнинг қайталаниши борасидаги саволларга ҳозир аниқ жавобимиз йўқ. Бу номаълум», — деган Райан.
ЖССТнинг COVID-19 бўйича етакчи мутахассиси Мария ван Керкхове Шанхайда ўтказилган тадқиқотлар бўйича маълумотларни тақдим этди. Унинг айтишича касалликдан тузалганларнинг маълум қисмида антитана йўқ бўлган, айримларда эса бу борадаги жавоб аниқ намоён бўлган. Бироқ бу иккинчи қисмга кирувчиларнинг COVID-19 билан қайта касалланмаслик учун иммунитет шаклланганини англатмайди, дея қайд этди ван Керкхове. Унинг сўзларига кўра COVID-19’дан тузалганларни кўпроқ ўрганиш зарур (13 апрель ҳолатига кўра 300 минг нафардан кўпроқ одам коронавирусдан тузалган), сабаби бу орқали одамларда иммунитет пайдо бўлганми ёки йўқми, ушбу жараён уларни қанча вақт давомида ҳимоя қилиши борасида тушунчаларга эга бўлиш мумкин.
Райаннинг айтишича, вирусли инфекцияни у билан аввал касалланган одамнинг қайта юқтириб олиши камёб ҳодиса эмас. Одатда бу каби ҳолатлар вирус организмдан тўлиқ йўқ қилинмаганида кузатилади.
Апрелда Жанубий Корея юқумли касалликлар назорати ва профилактикаси маркази 50 нафардан кўпроқ беморларда улар COVID-19’дан тузалган деб топилганидан кейин яна коронавирус аниқлаган. Таиландлик тиббиёт ходимлари ҳам вирусга қайта чалиниш ҳолатлари кузатилганини маълум қилган.
Март ойида Роберт Кох институти раҳбари Лотар Вилер COVID-19 пандемияси яна икки йилга чўзилиши мумкинлиги ҳақида гапирган ва одамларда вирусга қарши иммунитет пайдо бўлишига кўп нарса боғлиқлигини таъкидлаганди.
10 апрелда «Роспотребнадзор» раҳбари Анна Попова антитана тести хулосаларига асосланиб, Россиянинг 3 фоиз аҳолисида COVID-19’га қарши иммунитет борлигини билдирган. Попованинг сўзларига кўра касалланганларнинг 20-25 фоизида инфекция аломатлари кузатилмаган.«Уларда касаллик аломатлари йўқ, сабаби бу одамларда инфекция ривожланаётгани йўқ. Бунда организмида коронавирус бор касаллик ташувчиларда иммунитет бор ёки йўқлиги номаълум», — деган Попова.
ЖССТ раҳбари Тедрос Адан Гебрейесус 13 апрелда бўлиб ўтган брифингда COVID-19 устидан узил-кесил ғалабага хавфсиз ва самарали вакцина воситасида эриши мумкинлигини таъкидлаган. «COVID-19 жуда тезкор суръатларда ҳужум қилмоқда, чекиниши эса нисбатан секин кечмоқда», — деган ЖССТ раҳбари.
ЖССТнинг расмий маълумотида айтилишича, 13 апрель ҳолатига кўра бутун дунёда коронавирус юқтириб олиш бўйича 1 миллион 773 мингта ҳолат қайд этилган, 111 минг нафардан кўпроқ одам COVID-19 оқибатида вафот этган. Жонс Ҳопкинс университети ҳисоб-китоблари бўйича 13 апрель ҳолати бўйича жаҳонда вирус билан касалланганларнинг умумий сони 1 миллион 872 нафарга, ундан вафот этганлар эса 116 минг нафарга етган.
Изоҳ (0)