Британиянинг Burberry бренди COVID-19га қарши курашишга ўз ҳиссасини қўшиш мақсадида тренч ишлаб чиқариш фабрикасини, касалланганлар учун халат ва ниқоб ишлаб чиқариш учун қайта жиҳозлайди. Бу ҳақда Harper’s Bazaar нашри хабар берди.
Бошқа брендлардан ортда қолишни истамаган Burberry ҳам қўл қовуштирмасликни афзал билиб амалий ёрдамга киришди. Компания ишни глобал логистика тармоғини Буюк Британия миллий соғлиқни сақлаш хизматига 100 000 дан ортиқ ниқоб етказиб бериш учун тайёрлашдан бошлаган. Шунингдек, бренд Йоркширдаги тренч фабрикасини беморлар учун халат ва ниқоб ишлаб чиқариш учун қайта жиҳозлайди.
Бундан ташқари, компания вирусга қарши вакцина устида тадқиқот олиб бораётган Оксфорд университетини молиялаштирган ҳамда хайрия билан шуғулланувчи FareShare, The Felix Project ва бошқа ташкилотларга катта маблағ ажратган.
«Қийин вазиятларда бирлашишимиз керак. Burberry компаниясининг бутун жамоаси COVID-19’га қарши курашаётганларни қўллаб-қувватлай олишидан фахрланади. Коронавирус кундалик турмушимизни тубдан ўзгартириб юборганига қарамай, умид қиламизки, биз кўрсатаётган ёрдам одамлар ҳаётини сақлаб қолишга ҳисса қўшади. Барчамиз бирлашсак, бунинг уддасидан чиқамиз», — дейди Burberry раҳбари Марко Гоббетти.
Изоҳ (0)