Россия президенти Владимир Путиннинг матбуот котиби Дмитрий Песков Meduza нашрига берган интервьюсида нима сабабдан вирус блокаторидан фойдалана бошлаганига ойдинлик киритди. Песков блокатор тақишни ким тавсия қилгани ва у коронавирусдан ҳимоялай олиш ёки олмаслиги тўғрисидаги саволларга жавоб қайтарган.
«Бу восита вирусдан ҳимояланишга ёрдам бериш-бермаслигини билмайман. Мен уни дорихонадан сотиб олдим. Биласизми, ҳозир кўпчилик профилактика нуқтаи назаридан турли воситалардан фойдаланмоқда. Тўғриси, бунинг қандайдир фойдаси борлигига ишонмайман. Кўплаб экспертлар бу зарар келтириши мумкинлигини ҳақида таъкидлаганини ҳам ўқиганман», — деди Путиннинг матбуот котиби.
Meduza’нинг ёзишича, блокатор ишлаб чиқарувчи компаниянинг сайтида ушбу воситанинг самарадорлиги исботланмагани, аксинча, у нафас олишда хириллашга сабаб бўлиши ва инсон фикрларининг чалкашликларига олиб келиши ҳақида ёзилган.
«Фикрлар чалкашлиги ҳақида — матбуот анжумани якунлари бўйича бу борада ҳукм чиқаришингиз мумкин. Нафас йўлларида хириллаш эса ҳозирча йўқ. Нима бўлганда ҳам, ғамхўрлигингиздан миннатдорман», — дея қўшимча қилган Песков.
Аввалроқ Ўзбекистон ҳукумати аъзолари вирус блокаторларидан фойдалана бошлагани ҳақида хабар берилганди. 8 апрель куни Президент Мирзиёев раислигида ўтказилган видеоселектор йиғилиши лавҳасида бош вазир Абдулла Арипов, ички ишлар вазири Пўлат Бобожонов ва бош вазир ўринбосари — иқтисодий тараққиёт ва камбағалликни қисқартириш вазири Жамшид Қўчқоров вирус блокаторларини таққани кўринган.
Вирус блокаторларини ишлаб чиқарувчи Япония компаниясининг сайтида таъкидланишича, ушбу восита ҳавони дезинфекцияловчи ва дезодорация қилувчи хлор диоксидини тарқатиб, «бактериялар ва вируслар каби патоген микроорганизмларни самарали равишда йўқ қилади». Бу каби воситалар бўйича ҳозирги қадар зарур тадқиқотлар ўтказилмаган ва уларнинг вирусларга қарши самарали ҳимоя воситаси экани тўла исботланмаган.
Изоҳ (0)