Нью-Йоркда коронавирусга чалинганларни даволаётган шифокорлар жарроҳлик халатлари ўрнига ёмғирпўш ва чиқинди учун «пакет»ларни кийишга тайёргарлик кўрмоқда, деб хабар бермоқда «РБК» CNN’га таяниб. Бу ҳақда Нью-Йоркнинг Бруклин туманидаги SUNY Downstate тиббиёт маркази бош шифокори Уэйн Райли маълум қилган.
Унинг айтишича, ушбу марказда махсус тиббий халатлар захираси 1,5 кунга етади холос. Улар давлатнинг шахсий ҳимоя воситалари билан таъминлашини кута олмасликлари сабабли топқирлик қилиб бунинг чорасини кўришга ҳаракат қилмоқда.
«Барчамиз давлат захиралари тугаганидан хабардормиз. Шу сабабли вазиятга ижодий ёндашмоқчимиз», — деган Уэйн Райли.
Айни пайтда Нью-Йорк АҚШда коронавирус тарқалишининг ўчоғи бўлиб қолмоқда. Жонс Ҳопкинс маълумотларига кўра, айни пайтда шаҳарда коронавирусга чалинганлар сони 114 мингдан, вафот этганлар сони 3,5 мингдан ошиб кетган.
Аввалроқ Нью-Йоркнинг Бруклин туманида жорий ҳафтада икки ўзбекистонлик коронавирусдан вафот этгани ҳақида хабар берилган эди.
Изоҳ (0)