Bvlgari коронавирусга қарши дезинфекцияловчи геллар тақдим қилди

Бошқа соҳалар сингари мода саноати ҳам коронавирусга қарши курашишда фаол экани ҳақида аввалги мақолаларимизда тўхталган эдик. Ушбу олийжаноб ташаббусни қўллаб-қувватловчи машҳур брендлар сони кундан-кунга кўпаймоқда. Улар томонидан нафақат тиббиёт ходимлари балки оддий инсонлар учун ҳам чидамли ниқоблар, антисептиклар ва махсус либослар ишлаб чиқарилмоқда, деб ёзади Elle.

LVМН таркибига кирувчи Римнинг жаҳонга машҳур Bvlgari заргарлик уйи ҳам бу борада ўз ҳиссасини қўшмай қолмади. Бир ой аввал Spallanzani шифохонасига катта миқдорда маблағ ажратган компания, эндиликда ўзининг парфюм ишлаб чиқаришдаги анча вақтлик ҳамкори бўлган ICR (Industrie Cosmetiche Riunite, Lodi) билан биргаликда қўлни дезинфекцияловчи гелларни ишлаб чиқаришга қарор қилган. Таъкидланишича, бир неча юз минг нусхада ишлаб чиқариладиган антисептик восита, Италиянинг фуқаролик ҳимояси департаменти орқали мамлакатдаги барча тиббиёт муассасаларига топширилади.

Бренд бош директори Жан Кристоф Бабеннинг сўзларига қараганда, Bvlgari ҳамиша ҳунармандларнинг «ақлли қўллари» ижод ва сифат умумлашмаси ижобий натижа беришига ишонган. Лабoраторияларда дезинфекцияловчи гелларни тайёрлаш жараёнида эса, ушбу қўллар ​олдингидан ҳам кўпроқ жасорат кўрсатмоқда. Улар миллионлаб инсонлар ҳаётини сақлаб қолиш учун тинимсиз курашаётган шифокорлар, ҳамшира ва кўнгиллиларни қўллаб-қувватламоқда.