Украиналик аёл қишлоғида коронавирус тарқатгани учун тиз чўкиб кечирим сўради (видео)

Украинанинг Коленковци қишлоғида яшовчи аёл бошқаларга коронавирус юқтиргани учун қишлоқдошларидан кечирим сўраб, видеомурожаат йўллади.

Маълумотларга кўра, аёл пандемия авж олган бир пайтда Италиядан қайтиб келган, бироқ ўзини изоляцияда сақламаган. У жамоат ишларида фаол қатнашган, митингларга борган. Оқибатда аёлнинг фарзандлари ва набиралари, қишлоқ раиси коронавирус юқтириб олган, шунингдек, 14 нафар қишлоқдоши шифохонада даволанмоқда.

«Эшитишимча, уйимни ёқиб юбормоқчи, фарзандларим ва набираларимга куч ишлатмоқчи экансизлар. Мен бугун қайтиб келдим, коронавирусдан даволандим. Фарзандларим ҳам даволанди, уларни ўлдирманг. Хоҳласангиз мени ўлдиринг, агар бирор фойда берса майдалаб, чопиб ташланг. Мен сизлардан кечирим сўрайман», — дейди аёл.

Аёлнинг сўзларига кўра, у оиласи билан ҳеч қаерга чиқа олмай, ҳужжатлари билан уйда ўтирибди. Таъкидланишича, уйдаги озиқ-овқат ҳам тугаб қолган. «Макароннинг ҳам охирини еяпмиз», — дейди аёл. Шунингдек, у бошқа ҳеч қачон Италияга бормасликка ваъда берган.