Роналду 9,5 млн еврога Bugatti сотиб олди. Бу машина атиги 10 нусхада чиқарилган

«Ювентус» ҳужумчиси Криштиану Роналду Bugatti Centodieci автомобилини сотиб олди, дея хабар қилмоқда Bild.

Португалиялик футболчи автомобилга 9,5 миллион евро сарфлаган. Bugatti Centodieci модели бор-йўғи 10 нусхада чиқарилган. Роналду автоуловни 2021 йилда қабул қилиб олади.

Роналдунинг автотураргоҳида Bugatti компаниясининг Veyron ва Chiron маркалари ҳам мавжуд. 2019 йилнинг апрелида Роналду дунёдаги энг қиммат автомобиль — Bugatti La Voiture Noire'ни сотиб олганди.

Centodieci — италянчадан «110» деб таржима қилинади. У 1990 йиллар бошида лимитланган нусхада чиққан EB110 суперкарига бағишлаб ишлаб чиқилди. Ўртамоторли гиперкар 1600 от кучига эга 8-литрли W16 двигатель билан жиҳозланган. Автомобиль 100 километр/соат тезликка чиқиш учун 2,4 сония вақт сарфлайди. Максимал тезлик — 380 км/соат.