Сенатнинг видеоконференцалоқа шаклида ўтказилаётган 3-ялпи мажлисида Тупроққалъа туманини ташкил этиш масаласи кўриб чиқилади

Ўзбекистон Олий Мажлиси Сенатининг учинчи ялпи мажлиси 24 март куни ўз ишини бошлади. Бу ҳақда Сенат ахборот хизмати хабар берди.

Маълум қилинишича, аҳолининг санитария-эпидемиологик осойишталигини таъминлаш ва коронавирус инфекцияси тарқалишининг олдини олиш мақсадида, шунингдек, Тошкент шаҳрига кириш ва чиқиш 2020 йилнинг 24 март кунидан бошлаб тўхтатилганлиги муносабати билан ялпи мажлис видеоконференцалоқа шаклида ўтказилмоқда.

Сенаторлар томонидан ялпи мажлис кун тартибига киритилган қатор масалалар кўриб чиқилиши режалаштирилган. Жумладан, Сенат аъзолари Хоразм вилояти таркибида Тупроққалъа туманини ташкил этиш ҳамда Ҳазорасп тумани чегарасини ўзгартириш тўғрисидаги масалани кўриб чиқади.

Шунингдек, «Ўзбекистон Республикасининг Жиноят, Жиноят-процессуал кодексларига ҳамда Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида»ги, «Фуқароларнинг шахсий ҳуқуқ ва эркинликларини муҳофаза қилишга қаратилган қонун ҳужжатлари такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги, «Ўзбек тили байрами кунини белгилаш тўғрисида»ги, «III ва IV даражали ‘Соғлом авлод учун’ орденини таъсис этиш тўғрисида»ги, «‘Соғлом авлод учун’ медалини таъсис этиш тўғрисида»ги Ўзбекистон Республикаси қонунлари парламент юқори палатаси аъзолари томонидан муҳокама қилинади.

Эслатиб ўтамиз, аввалроқ Олий Мажлис Қонунчилик палатасида карантин эълон қилинган эди.