Ички ишлар вазирлиги ҳузуридаги Тергов департаменти февраль ойида Бухорода жайрон овлаган ва табиатга катта миқдорда зарар етказган «овчи»га нисбатан жиноий иш қўзғатилганини хабар қилди.
Хабарга кўра, 2020 йилнинг 16 февраль куни соат 17:00да 37 ёшли Ў.Х. Олот тумани «Ўрта чўл» массивида ёввойи ҳолда яшовчи жайронларни камёб ва йўқолиб бораётганлиги сабабли овлаш тақиқланган ҳамда Ўзбекистон Республикасининг Қизил китобига киритилганлигини била туриб икки бош жайронни «Урал» русумли мотоциклда қувлаган.
Ушбу шахс уларни ўқотар ов қуроли билан отиб, нобуд қилган ва табиатга жами 66 900 000 сўм миқдорида моддий зарар етказган.
Терговга қадар текширув ҳаракатлари давомида, икки бош жайрон танасида ўқ-дорилар мавжудлиги ва ушбу ўқ-дорилар жайронлар ўлимига сабаб бўлганлиги аниқланган.
Мазкур ҳолат юзасидан Олот тумани ИИБ ҳузуридаги Тергов гуруҳи томонидан Ў.Х.га нисбатан Ўзбекистон Республикаси Жиноят кодексининг 202-моддаси 3-қисми «ж» банди (Ўзбекистон Республикасининг Қизил китобига киритилган ҳайвонот ёки ўсимлик дунёси турларини нобуд қилган ҳолда содир этилган ҳайвонот ёки ўсимлик дунёсидан фойдаланиш тартибини бузиш) билан жиноят иши қўзғатилган.
Аввал Бухорода жайрон овлаганларга суд ҳукми ўқилган, қонунбузарлардан қарийб 67 млн сўмлик зарар ундирилиб 4 йилгача озодликни чеклаш жазоси тайинлангани, Навоий вилоятида жайрон овчиси ушлангани, шунингдек Қорақалпоғистонда 13 бош жайронни отиб ўлдирган браконьерлар қўлга олингани ҳақида хабарлар берилган.
Изоҳ (0)