Коронавирус тарқалишининг олдини олиш мақсадида 22 мартдан Тошкентда жамоат транспортларига қўйилган вақтинчалик тақиқ 23 мартдан бошлаб қатор вилоятларда ҳам турли шаклларда амал қила бошлайди. 23 мартдан бошлаб янги чекловлар киритилиши ҳозирча Хоразм, Қашқадарё ва Наманган вилоятларида расман эълон қилинди.
Хоразм вилояти ҳокимлиги матбуот хизматининг хабар беришича, 23 мартдан бошлаб Хоразм вилоятида туманлараро йўналишлардаги автобус ва йўналишли такси қатновлари ҳаракати тўхтатилади.
«Урганч ва Хива шаҳарларида автобус қатновлари 70 фоизга қисқартирилган ҳолда амалга оширилади. Бошқа барча туманлардаги автобус қатновлари тўхтатилади. Жамоат транспорти ўрнига вақтинча вилоят Санитария эпидемиология осойишталик маркази (СЭОМ) томонидан махсус дезинфекция қилинган таксилар ҳаракатланади. Ҳар бир йўналишсиз таксига СЭОМ томонидан дезинфекция қилингани ҳақида маълумотнома берилади. Шунингдек, барча такси эгаларидан йўл ҳақини сунъий равишда ошириб юбормай, нархларни мўътадил сақлаш сўралади», — дейилади хабарда.
Шунингдек, 23 мартдан бошлаб Қашқадарё вилояти ҳудудида ҳам мулкчилик шаклидан қатъи назар барча ташувчилар томонидан йўналишли маршрутлар (автобуслар, микроавтобуслар, Damas)да қатновлар вақтинча тўхтатилади.
Наманган вилояти ҳокимининг фармойиши билан, 23 мартдан бошлаб вилоят ҳудудида йўловчи ташиш фаолияти билан шуғулланувчи, мулкчилик шаклидан қатъи назар Damas русумли автотранспорт воситаларининг Наманган шаҳри ҳудудида ҳаракатланиши вақтинчалик тўхтатилади.
Фармойишга асосан, шаҳар ҳудудида автобус, микроавтобус ва йўналишсиз такси транспорт воситаларини кунлик дезинфекция қилган ҳолда фаолиятга чиқишлари қатъий белгилаб қўйилади. Вилоятнинг тегишли ташкилотларига жамоат транспорти (автобус, микроавтобус) ва йўналишсиз таксиларни кунлик дезинфекция қилган ҳолда фаолиятга чиқишини таъминлаш вазифаси юклатилган.
Аввалроқ 24 мартдан бошлаб вилоятлардан Тошкент шаҳрига ва пойтахтдан вилоятларга жамоат транспорти қатновлари тўхтатилиши режалаштирилаётгани ҳақида хабар берилганди.
Ўзбекистонда 23 март ҳолатига кўра, коронавирусга чалиниш билан боғлиқ 45 та ҳолат аниқланган. Мамлакатда 21 мартдан ошхона ва чойхоналар, барча кўнгилочар муассасалар фаолияти тўхтатилган, 23 мартдан сўнг тўйлар ўтказилиши тақиқланади. Расмийлар аҳолидан зарурат бўлмаса, кўчага чиқмасликни, карантин тартибига риоя этишни сўрамоқда.
Изоҳ (0)