Ижтимоий тармоқларда одамларнинг супермаркет пештахталарини бўшатиб, керагидан ортиқ қилган харидлари акс этган видеолар тарқалди. Ушбу видеоларга турлича муносабатлар билдирилди ва қораланди. Албатта, ҳар нарсани меъёри бор ва бундай вазиятда хариддан кўра, одамлар билан масофа сақлашга ҳаракат қилиш кераклиги тўғри, лекин инсон психологиясида ваҳима ва хавотирли вазиятларда ўзини ўзи чалғитиш, алдашга уриниши табиий эканини унутмаслик керак. Шоппинг эса мутахассисларнинг маълум қилишича, хавотир ҳиссини унутишда самарали ҳисобланади.
Агар айни дамда антисептик восита олиб кўнглингиз хотиржам бўлса, ёқтирган рангингиздаги бежирим либос олсангиз сиздан бахтли инсон бўлмайди. Тадқиқотлар натижаси шуни кўрсатадики, шоппинг ғам-ташвиш ва тушкунликка қарши ижобий таъсир қилади. Харид қилган киши муайян вазият устидан ёлғондан назорат ўрнатилгандек ҳисни туяди ва маҳсулот ёки буюмни қўлга киритганда кайфияти кўтарилади.
Коронавирус бир қанча соҳаларда инқирозлар бошланишига олиб келаётган бўлса, интернет дўконларнинг буюртмалари эса кўпайгандан кўпаймоқда. Карантинда уйдан чиқмади дегани харид қила олмайди дегани эмас, айниқса бу қиз ва аёлларга тегишли эканини эркаклар жуда яхши билса керак. Карантин вақтида, интернет дўконлари ва хизматларига келиб тушаётган буюртмалар сони саноқсиз. Шоппинг-терапия ёш-у қарига таъсир қилиши факт, лекин хариднинг дарҳақиқат зарур ёки муҳим эканлигига кўпроқ эътибор бериш керак.
Изоҳ (0)