Россиянинг Осетия республикасида кийим-кечак билан савдо қилувчи дўконлардан бири коронавирус сабаб уйда ўтирган харидорларни жалб қилиш учун ноодатий реклама акциясига қўл урди. Унга кўра, бирор кийим сотиб олган мижозга макарон ёки гречка совға қилинмоқда, деб ёзади «Korrespondent.net».
Таъкидланишича, Осетия дўконларида айрим маҳсулотлар тақчиллиги юзага келган, хусусан, маҳаллий аҳоли учун донли ва макарон маҳсулотлари етишмовчилиги кузатилмоқда.
Маҳсулотлар етишмаётганидан кийим-кечак дўкони фойдаланишга қарор қилиб, мижозларни ўзига жалб эта бошлаган.
«Коронавирус хавфи туфайли савдо марказларига бормаётган ёки пулларини озиқ-овқат маҳсулотлари учун сарфлаб юборган ҳурматли фуқаролар! Асло ғам чекманг — биз сизларни кутамиз. Дўкондон исталган буюмни харид қилсангиз, сизга гречка ёки макарон совға қилинади, танлов ихтиёрий», — дейилади дўконнинг реклама видеоролигида.
Аввалроқ Ўзбекистондаги тадбиркорлардан коронавирус карантини шароитида нархларни оширмаслик ҳақида кафолат хати олинаётгани ҳақида хабар берилганди. Тиббий ниқоблар нега қимматлашганининг сабаби тушунтирилган эди. Қайси товарлар нархи сунъий оширилиб, халқни ғазаблантираётгани айтилди.
Изоҳ (0)