20 март, жума куни, Марказий ҳарбий округида жойлашган Қуролли Кучлар Кичик мутахассисларни тайёрлаш марказида 150 нафар самарқандлик чақирилувчи Қорақалпоғистон Республикасига муддатли ҳарбий хизматга кузатилди. Бу ҳақда «Дарё»га Марказий ҳарбий округ матбуот хизмати маълум қилди.
Тадбирда округ қўмондонлиги, Самарқанд вилояти мудофаа ишлар бошқармаси ҳамда туман ҳокимлиги вакиллари иштирок этган.
Округ қўшинлари қўмондони полковник Айбек Саидовнинг айтишича, айни дамларда фуқароларни армияга кузатиш синовли ва эсда қоларли бўлмоқда. Махсус комиссия қарорига асосан, Ўзбекистонда хавфли инфекция тарқаб кетишининг олдини олиш мақсадида оммавий байрам тадбирлари вақтинча чеклангани сабабли армияга кузатилаётган фуқароларнинг ота-онаси ва яқинлари ушбу тантанали маросимда иштирок эта олмаяпти.
«Бу вақтинча, албатта. Бироқ туман ва вилоят йиғин пуктларида тушунтириш ишлари олиб борилишига қарамасдан, чақирилувчиларнинг ота-оналари фарзандларини хизматга кузатиш учун ҳарбий қисм ҳамда темир йўл вакзали олдида оммавий йиғилмоқда. Бу эса ҳозирги пайтда ўз ҳаёти ва ўзгалар соғлиғини хавф остига қўйиш билан баробар», — дейди Айбек Саидов.
Шунингдек, фарзандининг соғлиғи ҳақида қайғурганларга хавотирга ўрин йўқлигини айтиб, армияда аскарлар учун уйидагидан ҳам яхшироқ шароит яратилгани, хавфга қарши барча зарур чора-тадбирлар кўрилаётгани таъкидланган.
Эслатиб ўтамиз, 20 март ҳолатига кўра, Ўзбекистонда коронавирусга чалинганлар сони 33 нафарга етгани хабар берилганди. Санитария-эпидемиологик осойишталик агентлиги директори Баҳром Алматов коронавирусга чалинган илк беморлар тузалаётганини маълум қилган.
Изоҳ (0)