Фарғонада 19 ёшли қиз коронавирус юқтирдим деб ваҳима кўтарди

20 март куни ижтимоий тармоқларда Фарғона шаҳридаги 5-оилавий поликлиникада коронавирус инфекциясига чалинган бемор аниқланибди, деган мазмундаги хабар тарқалди.

Соғлиқни сақлаш вазирлигидан маълум қилишларича, шу куни мазкур поликлиникага 2001 йилда туғилган Фарғона шаҳридаги гўзаллик салонларининг бирида фаолият кўрсатувчи ходим — Х.Д. тана ҳароратининг ошиши, томоқ оғриши шикояти билан мурожаат қилган.

У белгиланган тартибда тиббий кўрикдан ўтказилган. Аммо бемор ўз шикоятларини баён қила туриб, яқинда Россияда бўлиб қайтган фуқаро билан мулоқотда бўлганини айтиб, барчани ваҳимага солган. Бу эса кўпчилик ўртасида асоссиз миш-миш тарқалишига ҳам сабаб бўлган.

«Шундан сўнг белгиланган тартибда поликлиника маъсул ходимлари томонидан вилоят соғлиқни сақлаш бошқармаси штабига хабар берилган. Кўрилган тезкор тадбирлар ва эҳтиёт чоралари натижасида беморга зудлик билан маслаҳат гуруҳи юборилиб, эпидемиологик анамнези тўлиқ ўрганилиб, профилактик нуқтаи назардан юқумли касалликлар шифохонаси изоляторига ётқизилган. Коронавирусни аниқлаш учун ПЗР усулида текшириш учун суртма олинди. Шу билан бирга, унинг оила аъзолари ҳам қатъий тиббий кузатувга олинган», — дейди вилоят соғлиқни сақлаш бошқармаси бошлиғи Одилжон Умаров.

Сўнгги маълумотларга қараганда, бемордан 20 март куни вилоят СЕО вирусология бўлими ходимлари томонидан ПЗР усулидаги 197-сонли олинган таҳлил хулосасига кўра, унда коронавирус инфекцияси аниқланмаган. «Шу ўринда фуқароларимиздан яна бир бор асосланмаган хабарларга, турли миш- мишларга ишонмасликларини сўраб қоламиз», — дейилади вазирлик хабарида.

Эслатиб ўтамиз, аҳоли орасида ваҳима чиқаришга қаратилган материалларни тайёрлаш ёки уларни тарқатиш мақсадида сақлаш 44 миллион 600 минг сўмдан 89 миллион 200 минг сўмгача миқдорда жарима ёки 3 йилгача ахлоқ тузатиш ишлари ёхуд 1 йилдан 3 йилгача озодликни чеклаш ёки 3 йилгача озодликдан маҳрум қилиш билан жазоланади.

Аҳоли орасида ваҳима чиқаришга қаратилган маълумотлар ва материалларни ҳар қандай шаклда тарқатиш 66 миллион 900 минг сўмдан 89 миллион 200 минг сўмгача миқдорда жарима ёки 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.

Ўзбекистонда COVID-19 коронавирусига чалинганлар сони 20 март ҳолатига кўра 33 нафарга етган.