Коронавирус тарқалиши ўчоғига айланган Хитойнинг Хубэй провинциясида ва Ухань шаҳрида сўнгги бир кун ичида касалик юқтириш бўйича бирорта янги ҳолат аниқланмади. Бу ҳақда Хитой соғлиқни сақлаш миллий комиссияси хабар берган, деб ёзмоқда «РБК».
Хитойнинг марказий провинциясида бир кунда 795 даволанган бемор шифохоналардан чиқарилган. Саккизта янги ўлим ҳолати қайд этилган.
Хубэйдан ташқарида 18 март куни эрталабдан бери биронта ҳам ўлим қайд этилмаган. Хитойнинг бошқа провинциялари ва автоном вилоятларида касалликка чалиниш бўйича 34 та янги ҳолат тасдиқланган.
Хубэйда эпидемия бошлангандан бери шифокорлар 67,8 минг нафар беморни рўйхатга олган, улардан 57,6 минг нафари тузалиб кетган.
Жаҳон соғлиқни сақлаш ташкилоти маълумотларига кўра, 18 мартда бутун дунёда коронавирус юқтирганлар сони 200 минг кишидан ошди. Касалликка чалиниш ҳолатларининг катта қисми, яъни 80 фоизи икки минтақада — Европа ва Осиё-Тинч океани минтақасига тўғри келмоқда.
Эслатиб ўтамиз, айни дамда Ўзбекистонда коронавирусга чалинганлар сони 18 нафарга етди. 11 март куни Франциядан қайтган, мамлакатдаги расман биринчи коронавирус ташувчисига айланган олий тоифали шифокор аёлнинг онаси, келини ва бирга ишлайдиган ҳамкасбида ҳам коронавирус аниқланган.
Изоҳ (0)