Ўзбекистонда leo_17 тахаллуси билан танилган таниқли Instagram блогери Шаҳзода Салимжонова коронавирусга таҳлил топширди, деб хабар бермоқда Repost.
Қайд этилишича, у март ойининг бошларида Европага саёҳат қилган. Уйига қайтганидан сўнг ва 16 март куни Ўзбекистонда биринчи марта коронавирус инфекцияси аниқланганидан кейин Шаҳзода ўзида коронавирус бор-йўқлигини аниқлаш учун ихтиёрий равишда Давлат санитария-эпидемиология назорати марказига мурожаат қилиб, таҳлил топширган.
«Соат кундузги 3 эди. Марказда одам гавжум эди. Сўровнома ўтказишди. Қаерга борганим, ким билан алоқада бўлганимни сўрашди. Бурнимдан суртма олишди. Шу холос. Мана, орадан бир кундан ортиқ вақт ўтган бўлса ҳам, ҳалигача жавобини олмадим. Барча қўнғироқларимга эса ‘бирор нарса бўлса ўзимиз боғланамиз’, дея жавоб беришди. Тушунмадим, мени ҳеч ким мажбур қилмаганди. Дўстларим бунга оддий муносабатда бўлишди. Уйда эса онам ҳатто, бундан ажабланди ва таҳлил топширишни ким талаб қилганини сўради. Мен буни нормал ҳолат деб ҳисоблайман. Ота-онам ўзи тиббиёт ходимлари ва шу сабабли буни ижобий қабул қилишди», — деган Шаҳзода Салимжонова.
18 март ҳолатига кўра, Ўзбекистонда коронавирусга чалинганлар сони 13 нафарга етди. 17 мартдан бошлаб Ўзбекистонда коронавирус тарқалишининг олдини олиш бўйича бир қатор профилактик чекловлар жорий этилди. Ўзбекистонда ички саёҳатлар ва оммавий тадбирлар вақтинча тўхтатилди.
Дунё бўйича эса коронавирусга чалинганлар сони 198 мингдан ошди. Коронавирус АҚШнинг барча штатларида аниқланди. Европада коронавирус қайд этилмаган бирорта давлат қолмади.
Изоҳ (0)