Американинг Огайо штатида истиқомат қилувчи фуқаро ўз автомобилига ҳозирда бутун дунё бўйлаб тарқалган янги турдаги коронавирус номини вақтинчалик рақам сифатида расмийлаштирди. Эндиликда унинг 1986 йилда ишлаб чиқарилган Ford Mustang машинасига COV1D19 автомобиль рақами илинган, деб хабар беради Motor.
Америка — фуқаро ўзи учун исталган рақам ва ҳарфлардан иборат автомобиль рақамини буюртма қилиш имкониятини берувчи дунёдаги ягона давлатлардан бири. Ягона шарт — автомобиль рақамида ҳақоратли ёки уятли сўзлар бўлмаслиги керак.
Бу каби рақамни буюртма қилиш фикри эркакка дўстлари билан барда коронавирусни муҳокама қилиб ўтирганида келган. Суҳбат давомида у автоинспекциядан вирус номига боғлиқ рақамни сўраб кўришга қарор қилган.
Эртаси куни Огайо штатидаги транспорт бюросига бориб, буюртмани амалга оширган. Ҳеч қандай муаммоларсиз эркакка автомобиль рақамининг вақтинчалик қоғоз вариантини беришган, яқин орада унга ҳақиқийси топширилади.
Февраль ойининг охирида яна бир америкалик «Мен Худоман» деб ёзилган автомобиль рақамини бермагани учун Транспорт департаментини судга бериб, 150 минг доллар товон пули ундирган эди. 80 ёшли эркак суд жараёнларига тўрт йил вақтини сарфлаган, аммо шунга қарамай ўз мақсадига эришиб, юқоридаги жумла ёзилган рақамни машинасига илиб қўйишга муваффақ бўлган.
Изоҳ (0)