Соғлиқни сақлаш вазирлиги томонидан 1003 ягона қисқа рақамли Call-марказ ишга туширилди. Бу ҳақда вазирлик жамоатчилик билан алоқалар бўлими хабар берди.
«Коронавирус инфекцияси ёки ўзингиз ва яқинларингиз саломатлиги билан боғлиқ саволларингиз бўлса шу рақамга қўнғироқ қилиб, мутахассислардан тиббий асосланган жавоблар ва тавсияларни олишингиз мумкин. Call-марказ тун-у кун хизматингизда бўлади», — дейилади хабарда.
Эслатиб ўтамиз, ҳозирда Ўзбекистонда коронавирусга чалинганлар сони олти нафарга етди. Вирусология илмий текшириш институти директори Эркин Мусабоевнинг айтишича, Ўзбекистонда коронавирусга чалингани аниқланган олти беморнинг аҳволи қониқарли.
Ўзбекистонда 15 март, якшанба куни, коронавирусга чалиниш билан боғлиқ илк ҳолат қайд этилган эди. Вирус 11 март куни Франциядан қайтган аёлда аниқланган эди. Кейинроқ, 16 мартга ўтар кечаси COVID-19 коронавирус касаллигини юқтирган фуқаролар сони яна уч нафарга кўпайгани маълум бўлди.
Улардан бири 15 март куни тонгда Истанбулдан қайтган эркак бўлса, қолган икки нафари биринчи бемор — 11 март куни Франциядан қайтган аёлнинг ўғли ва қизи экани маълум қилинган эди. Маълум қилишларича, айни пайтда ушбу фуқаронинг турмуш ўртоғи ва неварасида ҳам коронавирус инфекцияси қайд этилган.
Мавзуга доир: Коронавирусдан ҳимояланиш бўйича асосий чоралар
Изоҳ (0)