Одамлардан ёрдам сўраб видеомурожаат қилган 8 ёшли жиззахлик боланинг уйига сенатор ташриф буюрди ва ҳолатни ўрганди (видео)

Жиззахлик 8 ёшли бола бувисига бўлаётган таҳдидлар сабабли одамлардан ёрдам сўраб видеомурожаат йўллаган. Боланинг мазкур мурожаати Ўзбекистон Сенати аъзоси томонидан ўрганилди. Бу ҳақда Сенат томонидан маълум қилинди.

Хабар берилишича, Сенатнинг Ёшлар, маданият ва спорт масалалари қўмитаси томонидан 2020 йил 23 февраль куни 8 ёшли Муҳаммадали Султоновнинг YouTube тармоғи орқали йўллаган видео мурожаати жойнинг ўзига бориб ўрганилган.

Қўмита аъзоси, сенатор Санобар Суярова боланинг уйига шахсан бориб, вазият билан атрофлича танишган. Маълум бўлишича, Муҳаммадали Султонов Жиззах вилояти Жиззах шаҳри Ёшлик маҳалласида бувиси Ҳусния Салоҳиддинова билан истиқомат қилиб келмоқда. Бола 7 ойлигидан бери унинг онаси Азиза Салоҳиддинова Россияда яшайди. Муҳаммадали Жиззах шаҳридаги хусусий мактабининг 2-синфида тўлов асосида ўқийди.

Боланинг бувиси Ҳусния Салоҳиддинованинг сўзларига кўра, 2016 йилда Жиззах шаҳар ҳокимлигининг инсон ҳуқуқларини ҳимоя қилиш бўлими ходими Алишер исмли шахс ўз уйини уларга сотиш важи билан улардан 4 минг доллар ва 2 миллион сўм пулни алдов йўли билан олган. Кейин эса Алишер ишидан бўшаб, қочиб кетган. Шундан сўнг Ҳусния Салоҳиддинова Алишерни судга берган. Суд қарори билан Алишер айбдор деб топилган ҳамда пулларни қайтариш бўйича тилхат ёзиб берган.

Суд қароридан сўнг боланинг бувисига нисбатан турли таҳдидлар бошланган. Хусусан, 2020 йил 10 январь куни у номаълум шахслар томонидан тиббий кўрикдан ўтиш баҳонасида руҳий касалликлар шифохонасига олиб кетилган, руҳий касал эканлиги баҳонасида 3 соат ушлаб турилган. Бироқ текширувдан сўнг унинг ақлий ва руҳий жиҳатдан соғлом эканлиги исботланиб, уйига қайтариб юборилган. Ўша кундан бери Муҳаммадали бувисининг руҳий касалликлар шифохонасига олиб кетилиши мумкинлигидан қўрқиб, мактабга бормаётганлиги аниқланди.

Ушбу масала сенатор томонидан шаҳар ҳокими билан атрофлича муҳокама қилинган. Натижада маблағни ундириш бўйича Мажбурий ижро бюросига кўрсатма берилган. Ўрнатилган тартибда Ҳусния Салоҳиддиновага моддий ёрдам кўрсатиш масаласи ўрганиладиган бўлди. Шунингдек, сенатор Санобар Суярова Муҳаммадали ўқиётган мактаб директори билан гаплашиб, унинг бепул таълим олишга эришди.