АҚШ президентлигига номзодини илгари сураётган Нью-Йорк собиқ мэри Майкл Блумберг бўйи пастлиги учун устидан кулиб, уни «мини Майкл» деб атаган Дональд Трампга жавоб қайтарди, деб хабар беради «РБК».
Ўзининг тарафдорлари қаршисида чиқиш қилган Блумберг, туғилиб ўсган жойида одамлар бўйни ва ундан юқори қисми билан ўлчанишини маълум қилган.
Бунга жавобан Трамп ўзининг Twitter’даги саҳифаси орқали Блумберг куннинг асосий омадсизига айланганини ёзиб қолдирган.
«Унинг ‘сиёсий’ маслаҳатчилари Блумбергнинг ўзига овоз бермади. Бунинг оқибатида 700 миллион доллар ҳавога учди ва унга фақатгина ‘мини Майкл’ лақаби ҳамда бутунлай яксон бўлган шуҳрат қолди», — дейди АҚШ президенти.
Дональд Трамп Блумбергни тез-тез «мини Майкл» деб атаб туради. Нью-Йорк собиқ мэри бўйининг баландлиги 173 сантиметр. Трампнинг бўйи эса 190 сантиметр.
Аввалроқ Демократлар партиясидан АҚШ президентлигига номзодини илгари сураётган миллиардер Майкл Блумберг агар президент этиб сайланса, 40 йил олдин асос солган Bloomberg LP компаниясини сотиб юборишини маълум қилганди. Шунингдек, у Трамп АҚШ президентлиги сайловида ютқазиши учун миллиард доллар сарфлашга тайёрлигини ҳам билдирганди.
Изоҳ (0)