Фарғона водийсидан қўшни Қозоғистонга борувчи йўловчиларга қўшимча қулайликлар яратиш мақсадида транспорт вазирлиги томонидан Фарғона—Олмаота йўналишида мунтазам автобус қатновлари йўлга қўйилмоқда.
Транспорт вазирлиги матбуот хизматининг хабар беришича, ушбу йўналиш бўйлаб қатновлар 2020 йилнинг 4 мартидан бошланади. Йўналишнинг умумий масофаси 1202 километр бўлиб, ҳаракат вақти 22 соату 20 дақиқани ташкил этади.
Қатнов «Фарғона шаҳар атрофи» автошоҳбекатидан соат 11:00 да бошланади. Чипталарни «Фарғона шаҳар атрофи» автошоҳбекати ва «Сайран» автовокзалларидан харид қилиш мумкин.
Мазкур йўналишда Uzautotrans Service ва «Тулпар-Байконир» корхоналари йўловчиларга хизмат кўрсатади.
Аввалроқ Тошкент—Омск ҳамда Тошкент—Москва —Тошкент йўналишида мунтазам автобус қатнови йўлга қўйилиши, Самарқанд—Тошкент—Санкт-Петербург йўналишида доимий автобус қатнови бошлангани хабар берилган эди.
Изоҳ (0)