Туркия ҳукумати Суриянинг Идлиб вилоятида турк ҳарбийлари ҳалок бўлганидан сўнг, мамлакат аҳолиси учун айрим ижтимоий тармоқлар ва YouTube видеохостингига киришга тақиқ қўйди. Бу ҳақда маҳаллий ОАВга таяниб, «РБК» хабар берди.
Haberturk нашрининг маълумотларига кўра, дастлаб Тurk Telekom провайдери, кейинроқ бошқа провайдерлар ҳам фойдаланувчиларнинг Twitter, Instagram, Facebook, шунингдек, WhatsApp мессенжерига блокировка қўйган. Dirilis Postasi нашрининг ёзишича, Туркия аҳолиси YouTube’га ҳам кира олмаяпти.
NetBlocks халқаро нотижорат мониторинг ташкилотининг таъкидлашича, турк операторлари Идлиб вилоятида турк қўшинларининг позицияси ўққа тутилгач, ижтимоий тармоқларни блоклаб қўйган. Блокировканинг асосий сабаби — ҳалок бўлган ва яраланган турк ҳарбийлари сони тўғрисида нотўғри маълумотлар тарқалишининг олдини олиш.
Аввалроқ Туркия ҳарбий карвони Суриянинг Идлиб вилояти Ал-Бара қишлоғида Сурия қўшинларининг ҳужумига учраган эди. Ҳужум оқибатида турк колоннасининг 65 та автомобили шимолга чекинишга мажбур бўлган. Сўнгги маълумотларга кўра, 33 нафар турк ҳарбийси ҳалок бўлган.
Изоҳ (0)