Коронавирус сабабли Brent нефтининг нархи яна пасайди

ICE биржаси маълумотларига кўра, Brent туридаги нефтнинг бир баррели нархи 52,64 долларгача пасайди, деб хабар бермоқда «Коммерсантъ».

WTI туридаги нефтнинг нархи эса 48 долларгача пасайган. Бу 2019 йил 7 январидан буён қайд этилган энг паст кўрсаткич.

Қайд этилишича, бунга коронавируснинг Хитой ташқарисидаги мамлакатларга тарқалиши сабаб бўлди.

Аввалроқ Moody’s рейтинг агентлиги вируснинг 2008—2010 йиллардаги молиявий инқироздан кўра жиддийроқ оқибатларга олиб келиши мумкинлиги тўғрисида огоҳлантирган. Bloomberg нашрига кўра, нефтга талабнинг бу даражада пасайиши 2008—2009 йиллардаги молиявий инқироз давридан бери энг йириги ва 11 сентябрь терактларидан бери энг кутилмагани бўлди.

Маълумот учун, Хитой дунёдаги энг катта нефть импорт қиладиган давлатлардан бири бўлиб, мамлакатда кунига 14 миллион баррель нефть ишлатилади. Бу Франция, Германия, Италия, Испания, Буюк Британия, Япония ва Жанубий Кореянинг биргаликда бир кунлик истеъмолига тенг.