«Ўзбекзаргарсаноат» уюшмасида Қонунчилик палатасининг Саноат, қурилиш ва савдо масалалари қўмитаси томонидан «Қимматбаҳо металлар ва қимматбаҳо тошлар тўғрисида»ги қонун лойиҳаси муҳокамасига бағишланган давра суҳбати ўтказилди.
Парламент сайтида маълум қилинишича, Вазирлар Маҳкамаси томонидан киритилган мазкур қонун лойиҳасининг мақсади мамлакатнинг иқтисодий, илмий ва ижтимоий-маданий манфаатларини таъминлаш, Ўзбекистон субъектларининг қимматбаҳо металлар ва қимматбаҳо тошларни қазиб олиш, ишлаб чиқариш, улардан фойдаланиш ҳамда уларнинг муомалада бўлиши соҳасида шартномалар тузиш хусусиятларини белгилашдан иборат.
Лойиҳада қимматбаҳо металлар ва қимматбаҳо тошлар муомаласи соҳасидаги давлат органлари, бошқа иштирокчиларнинг ваколатлари ҳамда жавобгарлик соҳасини аниқ чегаралаш кўзда тутилган. Соҳага хорижий инвестицияларни кенг жалб этиш учун қулай шароит яратиш ва рақобат муҳитини яхшилаш масалалари эътибордан четда қолмаган.
Шу билан бирга, лойиҳада келгусида соҳада тенглик муҳитни яратиш, маҳсулотларнинг таннархини тушириш, рақобатбардош маҳсулотларни ишлаб чиқариш, тадбиркорлик субъектлари учун кўпроқ эркинлик ва имконият бериш асосида янги иш жойларини ташкил этишдан ҳамда солиқ тушумлар миқдорини кўпайтириш кабилар назарда тутилган.
Мавзуга доир: Ўзбекистонда заргарлик буюмларини ишлаб чиқариш, импорт қилиш ва реализациясини назорат қилиш тартиби белгиланди
Муҳокама этилаётган қонун лойиҳаси ҳозирда ушбу соҳада мавжуд бўлган хуфиёна иқтисодиётни бартараф этишга ва соҳада қонуний фаолият юритишга имконият яратади.
Таъкидланишича, қонун лойиҳасининг қабул қилиниши тадбиркорлик субъектларнинг шу соҳадаги фаолиятини жадал ривожлантиришга, уларнинг ҳуқуқларининг ишончли ҳимоя қилинишига, қимматбаҳо металларнинг ноқонуний айланмасининг олди олинишига ёрдам беради.
14 февраль куни Қонунчилик палатасининг Саноат, қурилиш ва савдо масалалари қўмитаси мажлисида Ўзбекистоннинг «Қимматбаҳо металлар ва қимматбаҳо тошлар тўғрисида»ги қонуни лойиҳасини биринчи ўқишга тайёрлаш юзасидан ишчи гуруҳи йиғилиши ўтказилган эди.
Изоҳ (0)