Светлана Ортиқова ҳалоллик вакцинаси нафақат прокурорларга, балки барча давлат хизматчиларига кераклигини билдирди. Бу ҳақда бош прокурор ўринбосари 20 февраль куни Халқаро пресс-клубнинг ижтимоий соҳага бағишланган навбатдаги сессиясида айтиб ўтди.
«Шахсан айта оламан, прокурорларнинг 90 фоизининг муомаласи яхши. Ишингиз тушиб борганингиздан кетгунингизгача қўли кўксида хизматингизда туради. Тўғри, 10 фоиз прокурорлар борки, бутун соҳа имижига салбий таъсир қилмоқда.
Ҳалоллик вакцинаси нафақат прокурорларга, балки барча давлат хизматчиларига керак. Чунки коррупция ҳолати давлат бюджети билан муносабатга киришиш жараёнида вужудга келади,», — дейди Светлана Ортиқова.
Унинг таъкидлашича, эски тартибга кўра прокурорлар фуқаролардан шикоят аризаси бўлмаса ҳам жиноят ишини ўрганишда иштирок этади. Бироқ давлат раҳбари мурожаатда прокурорлар ва адвокатлар энди фақат фуқародан шикоят аризаси бўлсагина жараёнга аралашиши мумкин бўлиши ҳақидаги қонуний ҳужжатни ишлаб чиқиш масаласини таклиф қилди.
«Мурожаатномада прокуратурага муҳим вазифалар қўйилди. Булар: соҳани ислоҳ этиш, соҳа ходимлари дунёқарашини ўзгартириш ва албатта, коррупция балосининг йўқотишдир. Суд-ҳуқуқ соҳасида фаолият юритаётган инсонлар виждонан ва ҳалол ишламаса, тизимнинг ўзи бундай инсонларни соҳадан чиқариб ташлайди. Ҳуқуқ соҳасида ишлайдиган ходимларни уйғонишга ва қонунларни яхши ўрганишга чақириб қоламиз», — деди у.
Изоҳ (0)