Ўзбекистон Президенти Шавкат Мирзиёев лицензия ва рухсатномалар сонини икки-уч мартага қисқартиришни топширди. Бу ҳақда адлия вазири Русланбек Давлетовнинг «Ўзбекистон 24» телеканалига берган интервьюсига таяниб, «Gazeta.uz» хабар берди.
Давлетовнинг таъкидлашича, ҳозирги кунда Ўзбекистонда лицензияланиши керак бўлган 266 турдаги фаолият ва 138 турдаги рухсат бериш тартиб-таомиллари мавжуд. Уларнинг рўйхати қайта кўриб чиқилгандан сўнг, жисмоний ва юридик шахсларнинг ҳуқуқ ва манфаатларига, шунингдек, жамоат хавфсизлигига путур етказадиган соҳалардагина лицензия берилади.
«Давлат ҳар бир соҳада ўзининг иштирок этиш чегараларини белгилаб олиши керак. Ушбу фаолиятни тартибга солувчи қонун 20 йил олдин қабул қилинган. Шунинг учун бизга ягона ҳужжат — лицензиялаш ва рухсат бериш тизимини комплекс тартибга солиш бўйича алоҳида кодексни ишлаб чиқиш топширилди», — дея хабар қилади Русланбек Давлетов.
Шавкат Мирзиёев йиғилишда 33 давлат органи лицензия бераётганини таъкидлаган. Масалан, Қурилиш вазирлиги 35 тадан ортиқ, Ахборот технологиялари ва коммуникацияларини ривожлантириш вазирлиги — 34 та, Таълим сифатини назорат қилиш давлат инспекцияси — 438 та, Соғлиқни сақлаш вазирлиги — 80 га яқин лицензиялар беради.
«Кимга керак? Эртага коррупция бўлмаслигига ким кафолат беради?» — деб сўраган давлат раҳбари.
Президентнинг таъкидлашича, лицензиялаш тартиб-таомиллари сонини қисқартириш ва лицензиялаш тизимини тубдан қайта кўриб чиқиш вақти келган, акс ҳолда «барча соҳалар ривожланишда орқада қолади».
Шавкат Мирзиёев адвокат мақомини олиш тартибини ҳам танқид қилган. Президент адвокатура тўғрисида қонун 2009 йилда қабул қилинганини эслаб ўтган. Ҳужжатда лицензия олиш учун адвокатлик мақомини олиш учун даъвогар камида икки йиллик юридик мутахассис тажрибасига эга бўлиши, шу жумладан, камида уч ой юристлик фирмасида амалиёт ўташи ва малака имтиҳонидан ўтиши шартлиги белгилаб қўйилган.
«Бир адвокатга 33 минг киши тўғри келади. Адолат қаерда? 2009 йилда қарор қабул қилинди: унда адвокат бўлиш учун сиз икки йил юрист бўлиб ишлашингиз кераклиги айтилган. Юристларнинг ўзлари йўқ. Аслида уларга лицензия олишларига йўл қўйиб берилмаган», — дейди Президент.
Йиғилишда хорижий тажрибада лицензиялаш ўрнига хабардор қилиш, мажбуриятни суғурталаш, ўзини ўзи бошқариш, техник тартибга солиш каби муқобил усуллар мавжудлиги таъкидлаб ўтилганини хабар берилганди. Хусусан, риэлторлик, аудиторлик, суд бошқарувчилиги каби фаолият турлари билан шуғулланувчиларнинг жавобгарлигини суғурталаш ёки ўз-ўзини бошқариш тизимларига ўтказиш мумкин.Маълумотларга кўра, лицензияларнинг 79 фоизи, рухсат берувчи ҳужжатларнинг 80 фоизи ҳанузгача қоғоз шаклида берилмоқда. «Лицензия» ахборот тизимлари комплекси 2014 йилда ташкил этилганига қарамай, бугунги кунда бу портал деярли фаолият юритмаяпти. Ўтган йили 4 мингдан ортиқ лицензия «бир дарча» тамойилига риоя қилинмасдан берилган. 1 августга қадар лицензия бериш билан боғлиқ барча жараёнларни тўлиқ автоматлашган ягона электрон тизимини ишга тушириш вазифаси қўйилган.
Изоҳ (0)