Хитойнинг электрон қурилмалар ишлаб чиқарувчи Xiaomi компанияси «Apple’га қарши қонун» талабларига мувофиқ ўз смартфонларига Россия дастурларини ўрнатишини маълум қилди. Бу ҳақда RNS хабар берди.
Xiaomi мазкур янги қонунга бўйсунишга розилик билдирган иккинчи компания бўлди. Аввалроқ Samsung компанияси мазкур янги талабларни бажаришга тайёр эканлигини маълум қилган.
Xiaomi’нинг баёнотида маълум қилинишича, компания Россия қонунчилигининг меъёрларига қатъий амал қилади ҳамда зарур ҳолатларда қўшимча дастурий таъминотни қурилмаларнинг ишчи режимида ўрнатади.
Xiaomi Россияда смартфонлар сотиш бўйича 4-ўринда туради, унинг улуши бозорда 14 фоизни ташкил қилади. Россия смартфонлар бозорида эса биринчиликни Samsung компанияси 26 фоиз билан эгаллаб турибди.
Смартфонлар, планшетлар ва компьютерларга Россия дастурларини ўрнатишни кўзда тутувчи қонун 2019 йилнинг декабрь ойида қабул қилинган. Тавсия этиладиган мобил дастурлар рўйхатидан браузерлар, харита хизматлари, давлат хизматлари дастурлари, мессенжерлар, ижтимоий тармоқлар ва почта хизматлари ўрин олган. Қурилмаларни ишлаб чиқарувчи компаниялар дастурларни ўрнатишни 2020 йилнинг июль ойидан бошлаши керак.
Янги қоидалар «Apple’га қарши қонун» деб аталади, чунки Apple компаниясига кўра, Россия уни мамлакатдан чиқиб кетишга мажбур қилиши мумкин.
Монополияга қарши кураш федерал хизмати қонунни кенгайтиришни режалаштирмоқда. Хизмат қонунга ўзгартиришлар киритишни таклиф қилган. Ўзгартиришлар операцион тизимларни ишлаб чиқарувчи компаниялар фойдаланувчиларга ўз дастурларини ўчиришга рухсат беришини кўзда тутади. Масалан, Android операцион тизими фойдаланувчиси Google’ни ўчириши мумкин бўлади.
Изоҳ (0)