Жиноят ишлари бўйича Тошкент шаҳар Юнусобод тумани судида 18 февраль, сешанба куни, фуқаро Лариса Толмачёва устидан навбатдаги суд иши бошланди. Аёл 2019 йилнинг 4 июнь куни Юнусобод туманида ўз автомобилида тўрт нафар ўсмирни босиб кетган эди. Болалардан бири воқеа жойида вафот этган. Суд мажлиси очиқ ҳисобланади, бироқ Repost нашри журналистлари суд залига киритилмаган.
Ўсмирнинг ўлими бўйича иш жамоатчиликнинг кенг муҳокамаларига сабаб бўлган. Вафот этган ўсмирнинг амакиси Михаил Ахпержаньянц бир неча марта журналистларни суд мажлисида иштирок этишга ва воқеаларни кенг ёритишга чақирган.
Мавзуга доир: Тошкентда Nexia ҳайдовчиси бир неча болани уриб юборгани юзасидан тергов деярли якунлангани маълум қилинди
«Биз сизга ручка ва қоғоз берамиз, ёзиб олинг», — деб айтган судья Элза Шамсутдинова.
Журналистлар вазиятга изоҳ беришни сўраганда, судья уларнинг мажлисда иштирок этишига рухсат бермаган ва улардан чиқиб кетишни сўраган.
Нашрнинг ёзишича, Олий суд матбуот котиби Азиз Обидов бундай ҳолатлар қайта такрорланмаслигини ва нашрнинг журналистлари бундан буён суд мажлисида иштирок этиши мумкинлигини маълум қилган.
Эслатиб ўтамиз, Андижонда ИИБ ходими томонидан калтакланган фуқаронинг иши бўйича суд мажлисига «Севимли» телеканали журналистлари киритилмаган, Олий суд эса бу ҳолатга изоҳ берган эди. Аввалроқ эса «Qalampir.uz» интернет нашри журналисти Зафарбек Солижонов 22 январь куни жиноят ишлари бўйича Тошкент вилояти судига киритилмаган эди. 2019 йилда жиноят ишлари бўйича Тошкент шаҳар суди судьяси Сардор Содиқов пойтахтдаги бозорлар раҳбарлари иши бўйича мажлис бошланишидан олдин «Gazeta.uz» мухбири Шуҳрат Латиповни суд залидан четлаштирган эди.
Изоҳ (0)