Си Цзиньпин коронавирусга қарши курашда Хитойга кўрсатилган ёрдам учун Шавкат Мирзиёевга миннатдорлик билдирди

Хитой президенти Си Цзиньпин мазкур мамлакат халқига ҳамдардлик ва кўрсатилган ёрдам учун Ўзбекистон Президенти Шавкат Мирзиёевга миннатдорлик билдирди. Бу ҳақда Президент матбуот хизмати хабар берди.

Хитой Халқ Республикаси раиси Си Цзиньпин Ўзбекистон Президенти Шавкат Мирзиёевга йўллаган мактубда бундай дейилган:

Муҳтарам Президент жаноблари!

Хитой коронавирус тарқалишига қарши олиб бораётган кураш муносабати билан йўллаган таъзияномангиз учун Сизга самимий миннатдорлик билдираман.

Айтишганидек, қаердадир кулфат юз берса, ҳар ёқдан ёрдамга шошиладилар. Дунё ҳамжамияти, шу жумладан Ўзбекистон, Хитой ҳукумати ва халқига ҳамдардлик билдирди ва турли кўринишда қўллаб-қувватлади. Бу бизга бўлган дўстона муносабатни тўлиқ намоён этди.

Хитой эпидемияни профилактика қилиш ва назоратга олиш борасида муваффақиятга эришишига ишончи комил ва бунга қодир, шунингдек, бутун жаҳонда жамоат соғлиғини сақлаш ишига ҳисса қўшиш йўлида халқаро ҳамжамият билан биргаликда ишлашга тайёр.

Мен Хитой—Ўзбекистон муносабатларини ривожлантиришга катта эътибор қаратмоқдаман ҳамда Сиз билан яқин мулоқотни давом эттиришга тайёрман.

Сизга мустаҳкам соғлик, фаолиятингизга муваффақиятлар, дўст Ўзбекистонга эса равнақ ва фаровонлик тилайман.

Си Цзиньпин, Хитой Халқ Республикаси Раиси

Эслатиб ўтамиз, Ўзбекистон 12 февраль куни Хитойга коронавирусга қарши курашиш учун гуманитар ёрдам юборган эди. Хитойга гуманитар ёрдам юбориш бўйича Тошкент халқаро аэропортида бўлиб ўтган тадбирда Ўзбекистон ташқи ишлар вазири ўринбосари Дилшод Аҳатов Ўзбекистон Хитойга ҳар томонлама ёрдам кўрсатишини айтган эди.

Аввалроқ, Туркия соғлиқни сақлаш вазири Фахриддин Кўжа Ўзбекистон Туркиядан коронавирусни икки соат давомида аниқлаш имконини берувчи тиббий анжомларни харид қилишини маълум қилди. Вазирга кўра, Жаҳон соғлиқни сақлаш ташкилоти тавсияларига асосан ишлаб чиқилган мазкур тиббий анжомлар коронавирусни 99,6 фоизгача аниқлик билан топади. Ўзбекистон ва Қирғизистон бундай комплектлардан 10 мингтадан буюртма қилгани билдирилмоқда, бироқ уларнинг нархи айтилмаган.

Қашқадарё вилояти соғлиқни сақлаш бошқармасида «Юқумли касалликлар профилактикаси» мавзусида ўтказилган матбуот анжуманида вилоятда 189 нафар фуқаро коронавирусга қарши тиббий кузатувга олингани маълум қилинди.

Хитой Миллий соғлиқни сақлаш комиссияси маълумотларига кўра, сўнгги бир сутка ичида мамлакатда коронавирус қурбонлари сони 142 кишига кўпайиб, яна 1323 киши касалликни юқтириб олган. 16 февраль ҳолатига кўра, Хитойда 68 500 ҳолатда коронавирус билан хасталаниш қайд этилган, жаҳон бўйича эса 69 мингдан ортиқ инсон вирус билан инфекцияланган. Хитойда коронавирус қурбонларининг умумий сони 1665 кишига етган, 9 419 киши эса касалликни енгиб ўтиб, тузалишга муваффақ бўлган.