Янги Зеландия ҳукумати томонидан ижарага олинган Air New Zealand авиакомпаниясига тегишли самолёт Хитойнинг коронавирус ўчоғи ҳисобланган Ухань шаҳридан 190 кишини олиб келди. Бу ҳақда Stuff нашри хабар берди.
Самолёт 5 февраль куни эрталаб соат 06:45 дан Ухандан парвоз қилган ҳамда соат кечқурун 18:00 атрофида Янги Зеландиянинг Окленд шаҳрига қўнган.
Ҳаво кемаси бортида Янги Зеландия фуқароларидан ташқари яна бир нечта мамлакат фуқароси бўлган.
Хусусан, йўловчилар орасида Папуа-Янги Гвинея (17 киши), Тимор-Лешти (17 киши), Самоа (5), Тонга (4), Фижи (2), Кирибати, Микронезия федерал штатлари, Ўзбекистон ва Нидерландия фуқаролари борлиги айтилмоқда. Шунингдек самолёт бортида саккиз нафар британиялик бўлган.
Эвакуация қилинган фуқароларнинг барчаси 14 кун давомида Шимолий Окленддаги Вангапараоа ярим оролидаги ҳарбий объектда карантин остида сақланади.
Қайд этилишича, рейсга чипта брон қилган 60 киши парвоз вақтида аэропортга келмаган. Бир неча фуқаро Янги Зеландияга қайтишдан бош тортган.
Бир нафар фуқарода парвозга қадар тиббий текширувда касаллик аломатлари аниқлангани учун у рейсга қўйилмаган.
5 февраль куни Хитойнинг мураккаб эпидемик вазият ҳукм сураётган Ухань шаҳридан 84 нафар Ўзбекистон фуқаросининг мамлакатга олиб келинди. Улар орасида 5 нафар Қозоғистон фуқароси ҳам бор.
Эслатиб ўтамиз, Хитойдаги Ўзбекистон фуқароларини эвакуация қилиш бўйича дастлабки чартер рейс 4 февраль, сешанба куни, соат 17:20 да Пекин—Тошкент йўналиши бўйича 251 нафар Ўзбекистон фуқаросини олиб келган эди. Уларда коронавирус аниқланмагани айтилди.
Изоҳ (0)