«Манчестер Сити» ҳужумчи Лионель Мессининг «Барселона» раҳбарияти билан кескин муносабатларидан унумли фойдаланиб қолмоқчи.
«Шаҳарликлар» 32 ёшли футболчи «Барселона»ни тарк этишни истаб қолса, уни қўлга киритишга тайёр, дея хабар қилмоқда ESPN.
Мессининг каталонлар билан амалдаги шартномаси 2021 йилнинг ёзига қадар мўлжалланган, бироқ келишувга кўра, аргентиналик футболчи 2020 йилнинг ёзидаёқ эркин агент мақомини олиш имкониятига эга.
«Манчестер Сити» Мессини қўлга киритиш учун асосий даъвогар бўлиб турибди. Манчестер шаҳри клубида фаолият юритаётган Чики Бегиристайн (спорт директори), Ферран Сориано (бошқарувчи) ва жамоа бош мураббийи Хосеп Гвардиола Месси билан «Барселона»да бирга ишлаган.
Таъкидланишича, «Сити» Мессига йилига 50 миллион фунт маош тўлай оладиган саноқли клублардан бири ҳисобланади.
La Gazzetta dello Sport’нинг хабар қилишича, Мессига шунингдек, «Манчестер Юнайтед», «Ювентус», «Интер» ва ПСЖ жамоаларидан ҳам қизиқиш бор.
Эслатиб ўтамиз, аввалроқ Месси ва «Барселона» спорт директори Эрик Абидал ўртасида келишмовчилик чиққани хабар қилинганди. Мессига Абидал «Барселона» собиқ устози Эрнесто Вальверденинг истеъфога чиқарилишида баъзи футболчиларни айбдор қилиб кўрсатгани ёқмаган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)