Ўзбекистон Олий Мажлиси Қонунчилик палатаси Спикерининг биринчи ўринбосари, академик Акмал Саидов 2020 йил 30 январь куни Парламентлараро иттифоқ (ПАИ) ижроия қўмитаси бошқарув органлари янги таркибини шакллантириш доирасида ПАИ вице-президенти ҳамда Молия бўйича кичик қўмита аъзоси этиб ҳам тайинланди. Бу ҳақда ТИВ матбуот хизмати хабар берди.
Ўзбекистоннинг Женева шаҳридаги БМТ бўлинмаси ва бошқа халқаро ташкилотлар ҳузуридаги доимий ваколатхонаси берган маълумотга кўра, 2019 йилнинг октябрь ойида тарихда илк бор Ўзбекистондан номзод ПАИ ижроқўми аъзоси этиб сайланган эди. Ўзбекистонда олиб борилаётган кенг кўламли ислоҳотлар эътирофи сифатида Акмал Саидов номзоди ташкилотнинг барча аъзо мамлакатлари томонидан бир овоздан маъқулланди.
1889 йилда ташкил қилинган ПАИ ҳозирги пайтда 179 та давлатни бирлаштиради ва дунё парламентларининг асосий халқаро органи ҳисобланади.
«Экспертлар фикрига кўра, жаҳон миқёсидаги қонун чиқарувчи органларнинг бундай нуфузли форуми фаолиятида қатнашиш 24 январь куни Шавкат Мирзиёевнинг Олий Мажлисга йўллаган Мурожаатномасида қўйилган вазифаларни янада самарали амалга оширишга ҳамда халқаро парламентлараро ҳамкорлик кун тартибини шакллантиришда Ўзбекистоннинг фаол иштирок этишига имкон беради», — дейилади хабарда.
Изоҳ (0)