Ўзбекистонда давлат ташкилотлари ёқилғи банк карталари билан таъминланади

«Давлат ташкилотларнинг миллий валютадаги ёқилғи банк карталаридан фойдаланиш тартиби тўғрисида низомни тасдиқлаш ҳақида»ги ҳукумат қарори лойиҳаси эълон қилинди.

Унга кўра, Марказий банк, Молия вазирлиги ва «Миллий банклараро процессинг маркази» (Humo) МЧЖ ҳамда тижорат банклари билан биргаликда давлат ташкилотларининг ҳар бир автотранспортига бир донадан ёқилғи банк карталари билан таъминлаш чораларини кўради.

Қайд этилишича, бундай чоралар давлат ташкилотларининг ёқилғи маҳсулотларини ёқилғи қуйиш шохобчаларидан харид қилиш шарт-шароитларини кенгайтириш, мазкур тизимни соддалаштириш ва электрон тизимни жорий қилиш мақсадида амалга оширилади.

Ёқилғи банк карталаридан фақат давлат ташкилотларининг хизмат автотранспортлари Ўзбекистон ҳудудида бензин, дизель, суюлтирилган ва сиқилган газ ёқилғисини ёқилғи қуйиш шохобчаларидан сотиб олиш учун фойдаланилади.

Ушбу банк картасини олган шахс уни ҳисобдорликка олган кундан бошлаб ҳар ойнинг 5-санасигача ёқилғи банк карталари воситасида ишлатилган суммалар тўғрисида давлат ташкилоти ва хўжалик субъектлари бухгалтериясига ҳисобот тақдим этиб бориши шарт.

Хизмат сафарлари билан боғлиқ хизмат автомашинасининг ёқилғи харажатларни тўлаш учун ёқилғи банк картасидан фойдаланганда, ёқилғи банк картасининг сақловчиси хизмат сафаридан қайтганидан кейин қонунда белгиланган муддатда ёқилғи банк картаси воситасида сарфланган суммалар тўғрисида бухгалтерияга ҳисобот тақдим этиши шарт.

Ёқилғи банк картасига ёқилғидан бошқа мақсадлар учун маблағлар ўтказишга, шунингдек, ёқилғи банк карталари воситасида нақд пул берилишига йўл қўйилмайди.

Карта ҳисоб варағидаги сарфланмай қолган маблағларни асосий талаб қилиб олингунча депозит ҳисоб варағига қайтариш тўлов топшириқномаси билан амалга оширилади.

Ёқилғи карта орқали амалга оширилган операцияларнинг қонунийлиги учун жавобгарлик карта ҳисоб варағини очган давлат ташкилоти зиммасида бўлади ва мазкур низом талабларини бузганликда айбдор шахслар белгиланган тартибда жавобгар бўлади.

Вазирлар Маҳкамасининг ушбу қарори лойиҳасини муҳокама қилиш 2020 йилнинг 19 февралига қадар давом этади.