Google’га тегишли Alphabet холдинги илк марта YouTube видеосервисига реклама жойлаштиришдан қанча даромад топиши ҳақида маълумот берди. Бу ҳақда «РБК» хабар берди.
Аввал улар интернетдаги алоҳида сервислардан қанча пул топиши ҳақида маълумот бермасди. Компания эълон қиладиган ҳисоботларда YouTube’ни ҳам ўз ичига олган бошқа хизматлардан олинадиган даромадлар келтирилар эди.
«Эндиликда биз бизнесимиз ва унинг истиқболлари ҳақида тўлиқроқ маълумот бериш учун YouTube ва Cloud каби алоҳида сервислардан қанча даромад олишимизни ошкор этмоқчимиз», — дейди Alphabet молиявий директори Рут Порат.
Alphabet эълон қилган ҳисоботга кўра, компания 2019 йилда YouTube’даги рекламадан 15,149 миллиард доллар даромад олган. Бу эса 2018 йилдаги 11,155 миллиард долларлик кўрсаткичдан 35,8 фоиз кўп дегани. 2017 йилда ушбу кўрсаткич 8,15 миллиард долларни ташкил этган.
Бундан ташқари YouTube’нинг реклама жойлаштириш билан боғлиқ бўлмаган даромадлари Google’нинг бошқа умумий даромадларига киритилган бўлиб, айнан ушбу йўналишда ўсиш 21 фоизни ташкил этиб, 14 миллиарддан 17 миллиардга ошган.
Изоҳ (0)