Европада трансфер ойнаси ёпилди. Сўнгги кунда амалга оширилган трансферлар

Европада 31 январь, шанба куни, трансфер ойнаси ёпилди. «Дарё» сўнгги куни амалга оширилган трансферлар ҳақида маълумот беради.

Дедлайн куни Англия Премьер Лигаси клублари фаол бўлди. «Арсенал» мавсум охиригача «Саутҳэмптон» ҳимоячиси Седрик Соарешни ижарага олди.

«Саутҳемтон»нинг яна бира ҳимоячиси Майа Ёшида ижара асосида «Сампдория»га йўл олди.

«Манчестер Юнайтед» «Спортинг» ярим ҳимоячиси Бруну Фернандеш билан шартнома имзолади ва уни таништирди. Манкунианлар шунингдек, «Шанхай Шенхуа» ҳужумчиси Одион Игалони мавсум охиригача ижарага олди.

«Тоттенҳэм» ўз ҳимоячиси Дэнни Роузни мавсум охиригача «Ньюкасл»га ижарага берди.

«Вест Бромвич» Польша терма жамоаси ярим ҳимоячиси Камил Гросицкини «Ҳалл Сити»дан сотиб олди.

«Лестер» ҳимоячи Райан Беннеттни «Вулверҳэмптон»дан ижарага олди.

«Барселона» «янги Криштиану» дея аталаётган Франсишку Тринкауни «Брага»дан сотиб олди. 20 ёшли футболчи ёзда каталонлар сафига келиб қўшилади.

«Кўк-анорранглилар» 7 миллион евро эвазига «Палмейрас» таянч ярим ҳимоячиси Матеус Фернандесни ҳам сотиб олди. Фернандес «Барселона» билан 5 йиллик шартнома имзолайди ва 2020 йилнинг ёзида жамоага келиб қўшилади.

«Атлетико» собиқ ярим ҳимоячиси Янник-Феррейра Карраскони ижарага олди. Хитойнинг «Далянь Ифан» жамоаси футболчиси мавсум охиригача мадридликлар сафида ҳаракат қилади.

«Сельта» Россия терма жамоаси ҳужумчиси Фёдор Смоловни мавсум якунига қадар ижарага олди.

«Аталанта» «Ницца» футболчиси Адриан Тамезни сотиб олиш ҳуқуқи билан мавсум охиригача ижарага олди.

«Милан» 20 ёшли Алексис Салемакерсни «Андерлехт»дан сотиб олиш ҳуқуқи билан мавсум охиригача ижарага олди.

Миланликлар ҳужумчиси Кшиштоф Пёнтек 27 миллион евро эвазига «Ҳерта»га ўтди. Немис клуби трансфер учун 27 миллион евро сарфлаган.

«Ҳерта» ҳужумчиси Деви Зелькени «Вердер»га 18 ой муддатга ижарага бериб юборди. Берлинликлар шунингдек, 18 миллион ерво эвазига «Лейпциг» ҳужумчиси Матеус Куняни сотиб олди.

«Лейпциг»нинг яна бир ярим ҳимоячиси Штефан Илзанкер эса «Айнтрахт»га йўл олди. «Буқалар» эса «Манчестер Сити» ҳимоячиси Анхелинёни мавсум охирига қадар ижарага олди.

Дортмунднинг «Боруссия» клуби трансфер ойнаси ёпилишига саноқли соатлар қолганида «Ювентус» ярим ҳимоячиси Эмре Жан трансферини маълум қилди. Немис клуби Жанни 30 миллион еврога сотиб олиш ҳуқуқи билан ижарага олган.

«Боруссия Д» ярим ҳимоячиси Якоб Бруун Ларсен эса «Ҳоффенҳайм»га йўл олди.

«Байер» 20 миллион евро эвазига «Витория Гимараэш» марказий ҳимоячиси Эдмонд Тапсобани сотиб олди.

«Ренн» Стивен Нзонзини мавсум охиригача «Рома»дан ижарага олди.

«Лилль» Николас Гайтан билан шартнома имзолади.

«Ницца» мавсум охиригача «Барселона»дан Мусса Вагени ижарга олди. Францияликлар футболчининг маошини тўлиб беради ва клубда футболчини 10 миллион еврога сотиб олиш ҳуқуқи бўлади.