Сурхондарё вилоят ҳокими Тўра Боболов 12 январь куни Ўзбекистон ДХХ Чегара қўшинларига қарашли ҳарбий қисм бўлинмасининг янги биносининг очилиш маросимида иштирок этди. Бу ҳақда Сурхондарё вилояти ҳокимлигининг ахборот хизмати хабар берган.
Барча қулайликларга эга бўлинма биноси фойдаланишга топширилди. Шу муносабат билан ташкил этилган тантанали тадбирда давлат ва жамоат ташкилотлари вакиллари, фахрийлар, ҳарбий хизматчилар ва бир гуруҳ ёшлар иштирок этди. Унда вилоят ҳокими, ҳарбий-маъмурий сектор раҳбари Тўра Боболов, ҳарбий қисм командири ўринбосари, подполковник Абдуғани Менглиқулов сўзга чиққан.
Янги бинони қуриб, жиҳозлаш учун 1 миллиард 200 миллион сўмдан ортиқ маблағ сарфланди. Кенг, шинам ётоқхоналар, барча қулайликларга эга ошхона, спорт зал, ўқув хонаси, ҳаммом, дам олиш хоналари, автосарой қурилди. Бино атрофи ободонлаштирилиб, мевали, манзарали дарахт ва турли гул кўчатлари экилди. Тантанали тадбир давомида ҳарбий хизматчиларнинг жанговар тайёргарлигига бағишланган кўргазмали машғулотлар, концерт дастури намойиш этилди. Меҳмонлар янги биноларни кўздан кечириб, ҳарбий хизматчиларнинг жанговар шайлигини ошириш, яшаш ва дам олишлари учун яратилган шароитлар билан яқиндан танишди.
Шунингдек, вилоят ахборот хизматининг хабарида, Термиз шаҳри яқинида, Амударёнинг қоқ ўртасида қамишзор, тўқайзор ва қумлардан иборат катта оламдан ажралган ўзига хос табиат мўъжизаси жойлашгани, майдони тахминан 4 минг гектарлик сатҳга эга, узунлиги 8, эни 5-6 километр бўлган бу оролда турфа ҳайвонлар эркин, ёввойи ҳолда яшаши, UNESCO’нинг табиат ёдгорликлари рўйхатига киритилган ушбу ҳудуд пайғамбарлардан бирининг рамзий қабри жойлашган манзил сифатида қадрланиши қайд этилган.
«Оролнинг «Пайғамбар ороли» номини олиши ҳам шундан — бу ерда Қуръони каримда зикр этилган йигирма беш пайғамбардан бири, милоддан аввалги VI-VII асрларда яшаб ўтган Зул-Кифл («кафолат соҳиби» маъносини билдиради) алайҳиссалом мақбараси мавжуд. XVII асрда яшаган балхлик машҳур қомусий олим Маҳмуд ибн Валий «Сирлар денгизи» асарида пайғамбар Зул-Кифл алайҳиссалом дафн этилган Термиз яқинидаги бу орол Ҳаким Термизий билан Ҳизр алайҳиссаломнинг учрашув жойи бўлганини қайд этади.
Оролдаги «Зул-Кифл» мақбараси турли даврларда бунёд этилган гумбазли катта масжид ва жанубдан туташган сағанали хилхона ҳамда ғарб томондан бириктирилган икки хонадан иборат. Масжид мураббаъ тарҳли, олди пештоқли, безаги ғишт чоргул ва арча тарзида терилган,меҳробига ганч гириҳ нақш ишланган. Мақбара 2018 йил бошида қайта таъмирланиб, обод ҳолга келтирилди. Ушбу орол қўшни Афғонистонга туташ бўлгани боис чегарачилар томонидан қўриқланади», – дейилади хабарда.
Изоҳ (0)