Якшанбадан душанбага ўтар кечаси Ўзбекистонга ҳақиқий қиш кирди, деб ёзмоқда «Ўзгидромет». Мамлакат ҳудудига Кавказ раёнларидан кирган совуқ антициклон бутун республикага, шимолий вилоятлар ва чўл зонасидан ташқари, ёғингарчилик олиб келди. Ёмғир кўринишида бошланган ёғинлар қорга айланди.
Қайд этилишича, 13 январь, душанба куни тонга келиб текислик ҳудудларида мавсумдаги биринчи қор қоплами ҳосил бўлиб, унинг баландлиги айрим жойларда 10—13 сантиметрни ташкил қилди.
Бугун куннинг биринчи ярмида республиканинг катта қисмида кучсиз қор ёғиши давом этди. Куннинг иккинчи ярмида ёғингарчиликнинг тўхташи кутилмоқда, фақат Фарғона водийси вилоятларида ва тоғли ҳудудларда қор кун давомида ёғади.
Эртадан бошлаб ва иш ҳафтасининг охиригача об-ҳавонинг қандай бўлишини антициклоннинг совуқ чегараси белгилайди. Бутун текислик ҳудудда об-ҳаво қуруқ ва совуқ бўлади. Фақат Ўзбекистоннинг тоғли ҳудудларида кучсиз қор ёғиши мумкин.
Шу кунларда ҳаво ҳарорати кечаси 2—7 даража совуқ, кундузи 2 даража совуқ — 3 даража илиқ бўлади. Бу январь ўртаси учун ҳарорат меъёрларидан 3—5 даражага пастдир.
Изоҳ (0)