Сўнгги вақтларда интернет сайтлари, ижтимоий тармоқ саҳифаларида Ҳаж ва Умра сафарларига оид «Ноинсофлар касофати», «Ҳажга қачон боришингизни биласизми ёхуд яна монополия ҳақида...», «Rixos tour» раҳбари Ҳаж ва Умра монополияси ҳақида...» сарлавҳали мақола ва материаллар эълон қилинди.
Шунингдек, турли айланма йўллар орқали Умра сафарига кетиб, у ерда қаровсиз қолган, саргардон бўлиб машаққат ва изтироб чекаётган фуқароларимизнинг аянчли ҳолатлари акс этган видеолавҳалар ҳам тарқалди. Мазкур видеолавҳаларнинг изоҳида ижтимоий тармоқ фойдаланувчилари томонидан турли фикрлар билдирилди. Аксарият фойдаланувчилар ҳукумат кўмагида ташкил этилаётган Умра тадбири орқали борилганда, бу каби сарсон-саргардонлик ҳолати юза келмаслигини таъкидлаган.
Вазирлар Маҳкамаси ҳузуридаги Дин ишлари бўйича қўмита ижтимоий тармоқларда эълон қилинган ушбу мақолалар ва уларнинг изоҳида қолдирилган шарҳларга муносабат билдирди.
«Зиёратчиларимиз учун Макка ва Мадина шаҳарларда яратилган шарт-шароитлар ва бошқа қулайликлар ҳақида кўп гапирилди. Бу ҳақида яна тўхталмоқчи эмасмиз, қизиққан инсонлар, хусусан, мақола муаллифлари Ўзбекистон Ҳаж ва Умра тадбирларини ташкил этиш ва ўтказиш масалалари бўйича жамоатчилик кенгашининг расмий Телеграм каналига кириб (@hajumrauz) батафсил маълумот олишлари мумкин. Шундагина ҳар хил гап-сўз қилмасдан, асл ҳолатни ўз кўзлари билан кўриб, даъволари асоссиз эканини англайдилар, деган умиддамиз», — дейилади муносабатда.
Таъкилданишича, қолдирилган айрим шарҳларда ҳозирда умрага бораётган зиёратчиларимиз «Масжидул ҳарамдан» 4—5 км узоқликда яшаётгани айтилган, бунга жавобан, Дин ишлари бўйича қўмита зиёратчилар Мадина шаҳрида «Масжидун Набавий»нинг шундоққина ёнида, атиги 50 метр узоқликда жойлашган 5 юлдузли «Пулман Зам-зам», Макка шаҳрида «Масжидул ҳарам»дан 4—5 километр узоқда эмас, аксинча 600—650 метр масофада жойлашган 4 юлдузли «Аброж ал-Кисва» меҳмонхонасида истиқомат қилаётганини айтиб ўтган.
«Ҳурматли мақола муаллифлари! Умра бу саёҳат эмас, ибодат эканини унутманг! Бу диний ибодатда асосий масала одамларни жўнатиб, пулини санаб олиш эмас, уларнинг хавфсизлиги ва дин амалларининг мукаммаллигидир.
Шу мақсадда ҳукумат кўмагида ташкил этилаётган сафарда зиёратчиларимизнинг Умра амаллари бекаму кўст, барча арконлари билан тўлиқ бажарилиши учун билимли, малакали, тажрибали диний соҳа ходимларидан иборат гуруҳ раҳбарлари (элликбошилар) бириктирилади», — дейилади муносабатда.
Аввалроқ Андижондаги турфирма томонидан Умра зиёратига жўнатилган 14 нафар ўзбекистонликнинг визаси сохта бўлиб чиққани, Саудия Арабистони ҳукумати томонидан уларнинг визаси бекор қилиниб, мамлакатдан депортация қилингани ҳақида хабар берилган эди. Қўмита баёнотида айтилишича, бу каби ҳолатлар тез-тез учрамоқда, Саудияда оғир аҳволда, машаққат чекиб, кўз ёш тўккан юртдошларимизнинг ҳасратлари акс этган фото ва видеолавҳалар ҳам тақдим этилмоқда.
«Мўмай даромад топиш илинжида фуқароларимизни сарсон қилаётган, мукаммал Умра ибодатини эмас, фақатгина нафсини ўйлаётганлар ҳеч нарсадан тап тортмаётгани, Умра сафарини ҳукумат ёрдамида расмий, хавфсиз ва ишончли ташкил этаётган Ўзбекистон мусулмонлари идораси ва Дин ишлари бўйича қўмитани «монопол» деб айблаётганлар одамларни чалғитиб, алдовлар билан уларнинг ишончига кириб, чув тушираётгани ачинарли ҳол, албатта!
Аслида, минглаб фуқароларимиз ҳукумат ёрдамида ташкил этилаётган Умра сафарига қийинчиликсиз, хавфсиз бориб келишмоқда. Бу ҳақиқатни бутун халқимиз билади, эътироф этади ва ташкилотчиларга раҳматлар айтишмоқда, бу ҳеч кимга сир эмас», — деб таъкидланган қўмита муносабатида.
Шунингдек, мақолалардан биридаги «Аввал ‘Умра’, энди ‘Умра+’ ҳам монопол бўладими?» деган саволга ҳам тўхталиб ўтилган.
Қайд этилишича, Дин ишлари бўйича қўмита ёки Ўзбекистон мусулмонлари идораси «Умра+» дастурини амалга оширишга кўмаклашади. Бу фаолият билан бевосита тадбиркорлик субъектлари, жумладан, турфирмалар ва компаниялар шуғулланади.
Дин ишлари бўйича қўмита ва Ўзбекистон мусулмонлари идораси — хорижий давлат делегациялари, хорижий ва маҳаллий ОАВлари, нуфузли дин арбоблари, жумладан, саёҳат агентликларининг мурожаатлари асосида Ўзбекистондаги зиёрат маршрутларида жойлашган объектларга хорижий сайёҳларнинг зиёратларини намунали ташкил этишда яқиндан ёрдам беради. Ҳозирга қадар ўнлаб ўзбекистонлик туроператорларнинг шу каби мурожаатлари асосида Ўзбекистонга зиёратлар намунали ташкил этилмоқда.
Шунингдек, таъкидланишича, «Vest Travel» сайёҳлик фирмаси ҳам Ўзбекистонга сайёҳларни олиб келиш ёки «Умра+» дастурида эркин равишда авиачипталарни сотиб олиши Ўзбекистонда барча сайёҳлик тадбирларини ташкил этиши мумкин, бу борада қўмита яқиндан ёрдам беради. Истаган саёҳат агентлиги ушбу йўналишда «Умра+» зиёратчилари учун авиачипталарни Uzbekistan airways АЖга мурожаат қилган ҳолда эркин харид қилиши мумкинлигини ҳам эслатиб ўтган. Бу борада Дин ишлари бўйича қўмита ваколат доирасида доимо ҳамкорликка тайёр эканлигини билдирган.
Изоҳ (0)