Муаммолар ичра қолаётган «Барселона»

Испания Ла Лигасининг 2019/20 йилги мавсуми биринчи даврасига якун ясалди. Тўғри, «Барселона» тўплар нисбатига кўра, азалий рақиби «Реал»ни ортда қолдириб, биринчи давра чемпиони бўлди.

Аммо бу «Барселона»да муаммолар йўқлиги ёки камлигини англатмайди. «Реал»дан фарқли ўлароқ каталонияликларда муаммолар керагидан кўпроқ. Зидан жамоаси ўйиндан ўйинга кучайиб бормоқда. Фақат бу йўлда Зиданга кутилмаган жароҳатлар халал бериб турибди. Агар жароҳатланган Азар, Васкес, Хамес, Асенсио, Марсело каби футболчилар тўлиқ куч билан сафга қайтса, «Реал»нинг ўйини фақатгина кучайиши мумкин. Ҳар ҳолда бизнинг фикримиз шундай. Бироқ ҳозир «Реал» ҳақида эмас, «Барселона» ҳақида гаплашамиз.

Юқорида таъкидлаганимиздек, «Барселона»да муаммолар кўп. Булардан биринчиси, албатта, — Вальверде жаноблари. Эрнестонинг узоқроқ мураббийлик курсисида қолиб кетаётганига сўзсиз Лео Месси сабабчи. Мессининг ақл бовар қилмас ҳаракатлари ва натижалари сабаб Вальверденинг кўплаб хатолари ёпилиб, кўринмай келмоқда. Ишонинг, «Барселона» Вальвердесиз ҳам ўйнай олади. Эҳтимол, икки йилдан бери шундай ўйнаб келаётгандир. «Барселона»нинг ҳозирги ўйинида мураббийнинг имзоси кўринаётгани йўқ. Аксинча, юқори даражага эга футболчилар сабаб «Барселона» ҳамон Ла Лигада фаворит. Чемпионлар Лигасида эса нималар бўлаётганидан бохабарсиз, деб ўйлаймиз.

Иккинчиси эса ҳимоя чизиғи аввалгидек ишончли эмаслигидир. Жумладан, Жорди Альбанинг ўйинида жароҳат сабаб пасайиш кузатилди. Унга ўринбосар сифатида олиб келинган Хуниор Фирпо эса ҳозирча ишончни оқлай олгани йўқ. Ўнг қанотнинг эса ҳозирча умуман эгаси йўқ. Ҳар ҳолда Нелсон Семеду ушбу қанотда «қирол» даражасига чиқа олмади. Марказ эса қанотлардан кўра, ҳали ҳам ишонса бўладиган даражада. Бунга сабаб Клеман Лангле. Француз Каталония клубида катта ўсишга эришди. Балки бунга ёнидаги тажрибали шерик — Херар Пикенинг борлиги сабабдир. Аммо Пикеда ҳам секин-аста ёш таъсири сезилмоқда. Февралда 33 ни қоралайдиган Пикенинг ўйинида ҳам пасайиш кузатилмоқда. Буни қаердан оляпсан, дейишингиз мумкин. Келинг, «Барселона»нинг сўнгги мавсумларда Ла Лигада қайд этган тўплар нисбатига назар ташлаймиз:

• 2018/19: 90-36
• 2017/18: 99-29
• 2016/17: 116-37
• 2015/16: 112-29

Сўнгги 4 та мавсум Каталония клуби Ла Лигада 36, 29, 37 ва 29 тадан гол ўтказган. Бу 38 та ўйинда эканлигини ёдда тутиб туринг, азиз мухлис. Жорий мавсум ортда қолган 19 та турда «Барселона» қуйидаги статистикани қайд этиб турибди: 49:23*. 19 та ўйинда 23 та гол «Барселона» учун, Тер-Штегендек дарвозабони бор клуб учун жуда ҳам кўп. Ҳимоя чизиғи муаммоси ҳақида гапираётганда немис дарвозабони борасида сўз очмганимизни тушунгандирсиз. Агар тер-Штеген бўлмаганида 23 рақами ўрнида бошқа каттароқ сон бўлиши табиий эди. Марк ҳозирги «Барселона»нинг чинакам бахти. Унинг йўқлиги эса Каталония дербисида яққол кўзга ташланди.

Майдон марказида ҳам муаммолар бор. Иван Ракитич ва Артуро Видалнинг клубдаги келажаги мавҳум бўлиб қолмоқда. Видаль атрофида миш-мишлар тўхтамаётган бўлса-да, у ҳозирча марказдаги энг фойдали футболчилардан бири бўлиб турибди. Артуро Ла Лигада 15 та ўйинда (579 дақиқа) майдонга тушиб, 6 та гол уришга эришди. Ракитичнинг статистикаси эса қуйидагича: 13 та ўйин (614 дақиқа) 2 та голли узатма. Майдон марказига Френки де Йонг олиб келинган вақтдаёқ Видаль ва Ракитичнинг захирада қолиб кетиши кутилганди. Бироқ Фрэнки ҳам ўтган мавсум «Аякс»даги ўйинини кўрсатаётгани йўқ. Бразилиялик Артур бўлса, мавсумни жароҳат билан ўтказмоқда. Серхи Бускетс ҳамон бир маромда ўйин кўрсатаётган кам сонли ўйинчилардан бири. Серхи Роберто эса ҳали ҳам ўнг қанот ва марказда сарсон. Футболчи гоҳ марказда ярим ҳимоячи ролида, гоҳ қанотда ҳимоячи сифатида кўриниш бермоқда. Аммо шундай бўлса-да, жорий мавсум Ла Лигада энг кўп вақтини майдонда ўтказган ўйинчилардан бири — 1363 дақиқа.

Лео Месси бор экан, «Барселона» ҳужум чизиғи ҳар доим хавфли бўлиб қолаверади. Месси—Суарес тандеми жорий мавсум «Барселона» голларининг энг кўп қисмига эгалик қилиб турибди. Мессида гол+пас 13+6 ни ташкил этиб турган бўлса, Суаресда бу кўрсаткич 11+7. Фақатгина трионинг учинчи вакили Антуан Гризманн Каталония клубига тўлиқ мослаша олгани йўқ. Аммо Месси ва Суарес бор жойда унинг натижалари ҳам чакки эмас — 7 та гол ва 5 та голли узатма. Шунинг учун ҳам ҳужум чизиғига ортиқча эътирозлар йўқ. Агар Гризманн Месси/Суарес билан ўйин борасида тил топишиб кета оладиган бўлса, нима бўлишини тасаввур қилаверинг. Камига Ансу Фати ҳам борлигини унутмаймиз.

Жароҳатланган Самюуэль Умтити сафга қайтса ҳимоя чизиғидаги муаммолар бироз бўлса-да ёпилиши мумкин. Усмон Дембеле эса ҳужум чизиғига ҳали ҳам фойда келтириши мумкин. Боиси Месси марказда ҳам ўйнай олишини ҳисобга олсак, ҳужум триосида Гризманн — Суарес — Дембелени кўриш қизиқроқ бўларди.

Нима бўлганда ҳам жорий мавсум «Барселона»га Ла Лигада осон бўлмаслиги аниқ. Муаммоларни эса муаммонинг ўзи (Вальверде) ҳал қила олса, бундан фақат мухлислар ютади. Сиёсат аралашган, зерикарли нурсиз, голсиз «Эль-Класико»дан кўра, кучга тўла «Барселона» ва «Реал» тўқнашуви кимга ёқмайди дейсиз, азиз мухлис!