Тошкент шаҳрида фавқулодда вазиятлар рўй берганда қўнғироқ қилинадиган ягона қисқа рақам тизимини яратиш таклиф этилмоқда. Тегишли петиция «Менинг фикрим» жамоавий мурожаатлар порталида эълон қилинган.
«Тошкент шаҳри аҳолисига қулайликлар яратиш мақсадида «Ақлли шаҳар» («Умний город») концепциясига қўшимча тарзда турли фавқулодда вазият ҳолатларида қўнғироқ қилинадиган телефон рақамларини (101, 102, 103, 104) ягона рақамга бирлаштиришни таклиф қиламан», дея Инновациялар ва АКТ йўналишида мурожаат йўллаган Баҳодиров Нодир Баҳодирович исм-шарифли фойдаланувчи.
Билдирилишича, фавқулодда вазият (авария, ёнғин, бетоблик, ис гази чиқиши каби) ҳолатларида одамнинг ўзини йўқотиб қўйиши натижасида рақамларда адашиш ёки тегишли рақамни ёддан чиқариб бир неча ташкилотларга қўнғироқ қилиниши ва бунда ортиқча вақт йўқотилишига сабаб бўлмоқда.
Ягона рақамга қўнғироқни амалга ошириш уч тилда сўзлай оладиган оператор хизматидан фойдаланишни таъминлаб, операторнинг фуқародан авария тафсилотларини аниқ ўрганиши, замонавий технологиялардан фойдаланган ҳолда, буюртма қабул қилиш жараёнида қўнғироқ қилувчининг жойини тез аниқлаши авария жойигача бўлган қисқа йўналишни танлашини таъминлайди.
Фуқаро билан суҳбатлашгандан сўнг оператор ўт ўчириш хизматига, ёнғинда жабрланувчилар бўлса, тез ёрдам хизматига ўзи қўнғироқни амалга оширади ҳамда ўрганилган маршрут ва қолган маълумотларни тақдим қилади. Шунингдек, оператор ижрочини назорат қилади ва ҳисоботини олиб, мониторингини юритиши ҳам мумкин.
«Шу сабабли Тошкент шаҳри аҳолиси учун фавқулодда вазият ҳолатларида қўнғироқ қилинадиган ягона қисқа рақам тизимини яратишни таклиф қиламан», дея якунланган петиция.
Мурожаат остида қолдирилган изоҳларда ушбу рақамнинг халқаро стандартларга мос равишда «112» ёки «911» бўлиши мақсадга мувофиқ эканлиги қайд этилган.
Изоҳ (0)