Қозоғистон бош вазири Асқар Мамин авиаҳалокат тафсилотларини ҳар томонлама ўрганиб чиқиш ва ҳалок бўлганларнинг оилаларига моддий ёрдам кўрсатиш ҳақида топшириқ берди, деб ёзмоқда «Tengrinews».
Бош вазир раҳбарлигида Bek Air самолёти авиаҳалокати сабабларини ўрганиш бўйича ҳукумат комиссияси йиғилиши ўтказилган.
«Олмаота вилоятида юз берган фожиа бутун Қозоғистон аҳолисини ташвишга солди. Авиаҳалокат оқибатида кўплаб одамлар жароҳат олиб, ҳалок бўлди», — дейди Мамин.
«Давлат раҳбарининг топшириғига кўра ҳалок бўлганларнинг оилаларига 4 миллион тангадан маблағ ажратилади. Талафот кўрганларга ҳам зарурий ёрдам кўрсатилади», — дея қўшимча қилган Қозоғистон бош вазири.
Мавзуга доир:
«Ҳалокат сабабларини ўрганаётган ҳукумат комиссияси ўз ишининг дастлабки натижалари ҳақида 2020 йил 10 январда маълумот беради», – дейди Асқар Мамин.
Ҳукумат раҳбари ҳалок бўлганларнинг яқинлари ва оила аъзоларига ҳамдардлик билдирди, жароҳатланганларга эса тезроқ соғайишни тилади.
Давлат раҳбари Қосим-Жўмарт Тўқаев топшириғи асосида ташкил қилинган комиссия иши ҳақида бош вазир ўринбосари Роман Скляр ҳисобот берди. Ички ишлар вазири Ерлан Тургумбаев ҳодиса жойида олиб борилаётган тергов суриштирув ишлари бўйича, соғлиқни сақлаш вазири Елжан Биртанов эса жароҳатланганларнинг соғлиғи ва ҳолати тўғрисида маълум қилди.
Bek Air авиакомпаниясининг самолёти 27 декабрь куни Қозоғистон маҳаллий вақти билан тонгги соат 7 да ҳалокатга учраган. Лайнер бортида беш нафар экипаж аъзоси, 93 нафар йўловчи, жумладан, 89 нафар Қозоғистон фуқаролари, икки нафар Украина, бир нафар Қирғизистон ва бир нафар Хитой фуқароси бўлган. Ўзбекистон ташқи ишлар вазирлиги ҳалок бўлганлар орасида ўзбекистонликлар йўқлигини билдирган. Авиаҳалокат оқибатида 15 нафар одам, хусусан, самолёт командири ҳалок бўлди. Расмий манбалар авиаҳалокат қурбонлари сонининг 12 нафар эканини маълум қилган. Олмаотадаги турли тиббиёт муассасаларига жами 49 нафар одам ётқизилган. Шавкат Мирзиёев Олмаотадаги авиаҳалокат муносабати билан Қозоғистон президентига таъзия билдирган.
Изоҳ (0)