26 декабрь, пайшанба куни Тошкентда ўтказилган «Миллий кинематография: ривожланиш истиқболлари ва устувор вазифалар» Республика кино форуми ўтказилди. Бу ҳақда «Ўзбеккино» матбуот хизмати «Дарё»га хабар берди.
Ушбу форумда «Киночилар уйи»ни қайта тиклаш, Тошкент халқаро кинофестивалини ўтказиш, Кинематография институтини ташкил қилиш, «Ўзбекфильм» туристик марказини очиш, миллий сериаллар студиясини яратиш сингари бир қатор масалалар муҳокама қилинди.
«Биз бугун янги йилга мўлжалланган, Ўзбекистон Республикаси бош вазири имзолаган ҳужжат асосида тузилган ‘Йўл харитаси’ни эътиборингизга ҳавол этяпмиз. ‘Йўл харитаси’ давлат раҳбари илгари сураётган қатор ташаббуслар, ‘Ўзбеккинў томонидан ўтказилган тадбир ва учрашувларда билдирилган фикрлар, таклиф ва ғояларни ўз ичига олади», — деди «Ўзбеккино» бош директори Фирдавс Абдухолиқов.
Шунингдек, «Йўл харитаси»да миллий кинони ривожлантиришга қаратилган қатор масалалар кўзда тутилган. Жумладан, «Ўзбекфильм» киностудияси ишлаб чиқариш биносини реконструкциялаш учун 40 миллиард сўм, «Ўзбеккино» Миллий агентлиги буюртмасига асосан суратга олинаётган «Илҳақ», «Ибрат» ва «101-рейс» фильмлари ва бошқа кино маҳсулотлари учун 17 миллиард сўм ёш киноижодкорлар учун етарли шарт-шароит яратиш мақсадида тегишли моддий-техник базасини мустаҳкамлаш учун 600 миллион сўм ажратилиши белгиланган.
Бундан ташқари янги йилда «Алишер Навоий номидаги кино саройи», «Республика кинопрокат маркази», «Дўрмон» киноижодкорлар уйи», «Қорақалпоқфильм» сингари иншоотларнинг реконструкция қилиниши ва фойдаланишга топширилиши, суратга олиш жараёнларида фойдаланиш учун 77 та ретро автомашина «Ўзбеккино»га берилиши ҳам маълум қилинди.
Шунингдек, жамоатчиликка икки йилда бир маротаба «Тошкент» халқаро кинофестивали ўтказиш ва унинг тегишли дирекциясини ташкил қилиш, Ўзбекистон кино санъати музейи, миллий фильмларни сақлаш, рақамлаштириш билан шуғулланувчи давлат кино фондини очиш, хорижий мамлакатларда архивларда сақланаётган миллий киноасарларимизни қайтариш масалалари ҳам тилга олинди.
«Йирик шаҳарларимизда тадбиркорларимиз кучи билан кинозалларга эга бўлган савдо-кўнгилочар комплекслари очиш ҳам асосий вазифаларимиздан саналади. Ана шу мақсадда ер майдонлари ажратиш, имтиёзли кредитлар бериш назарда тутилмоқда. Яқин келажакда Тошкент вилояти ҳудудида йирик кино шаҳарчаси қуриш лойиҳаси амалга оширилади. Ана шу мақсадда 120 гектарга яқин ер майдони ажратилади», — дейди Фирдавс Абдухолиқов.
Бундан ташқари форумда «Киночилар уйи»ни қайта ташкил этиш билан боғлиқ яна бир хушхабар айтилди. Янги «Киночилар уйи» «Ўзбеккино» ҳудудидаги «Замин» ресторани негизида бунёд этилади. Бундан ташқари «Ўзбеккино» тизимида меҳнат қилаётган истеъдодли ёшларни Тошкент шаҳрига прописка қилиш ва уларга ҳар томонлама имтиёзлар бериш масалаласи ҳам ҳукумат ҳужжатида кўзда тутилган.
Ўзбек киносаноатининг ривожи бевосита кадрлар масаласига бориб тақалади. Шу боис «Эл-юрт умиди» жамғармаси билан ҳамкорликда Бутунроссия давлат кинематография институтида 10 нафар, «Мосфильм» киноконцернига 20 нафар ходим ва мутахассисларни юбориш режалаштирилган.
Аввалроқ Самарқандда Голливуд типидаги Cinema City Sollywood кино шаҳарчаси қурилиши ҳақида хабар берилган эди.
Изоҳ (0)