Наманган шаҳрида 2020 йил биринчи чораги давомида барча 34 та чорраҳа йўл ҳаракат қоидалари бузилишини қайд этувчи камералар билан жиҳозланади. Бу ҳақда вилоят ИИБ ЙҲХБ бошлиғи Бахтиёр Дўстмуҳаммедов журналистлар билан бўлиб ўтган матбуот анжуманида маълум қилди, дея хабар беради «Дарё» мухбири Азизбек Абдувалиев.
Ҳозирда шаҳардаги 6 та чорраҳада шундай камералар ишлаб турибди.
Бахтиёр Дўстмуҳаммедовнинг таъкидлашича, келгуси йили вилоятдаги 56 та манзилга фоторадар ўрнатилади. Шунингдек, йўл ҳаракат қоидалари бузилишини қайд этувчи 5 та махсус автомобиль ҳаракатланишни бошлайди. Улардан учтаси ҳозирда жиҳозлаб бўлинган.
—Улар асосан тезликни ошириш, белгиланмаган жойда тўхтаб туриш, чизиқни босиш каби қоидабузарликларни қайд этади. Кўпроқ аҳоли гавжум жойлар, хусусан, бозорлар яқинида тирбандликни бартараф этиш билан шуғулланади, — дейди ЙҲХБ бошлиғи.
«Дарё» мухбирининг вилоятда жорий йил 10 ойи давомида ўлим билан тугаган йўл-транспорт ҳодисалари кўрсаткичи ўтган йилга нисбатан ортиб кетганлиги билан боғлиқ саволига Бахтиёр Дўстмуҳаммедов шундай жавоб берди:
— Бундай автоҳалокатлар асосан Қамчиқ довонидан водийга кириб келишда кўпроқ содир бўлмоқда. Йўлларнинг торлиги, ёритилиш ҳолати, қолаверса, ҳайдовчиларнинг чарчоғи каби омиллар бунда катта рол ўйнаяпти. Шу сабабли бундай йўлларда ЙПХ инспекторлари тунда қайтаётган ҳайдовчиларга бироз тин олишларини айтиб, иссиқ чой ёки қаҳва таклиф этмоқда. Қолаверса, йўлларни таъмирлаш, трассаларни ёритиш, светофорлар ўрнатиш каби масалалар бўйича маҳаллий ҳокимликларга тақдимномалар киритилмоқда, — дейди Бахтиёр Дўстмуҳаммедов.
Матбуот анжумани давомида журналистлар жорий йил 21—22 декабрь кунлари Қамчиқ довони ёпилиб қолганда жонбозлик кўрсатгани учун ЙПХ инспекторлари ва уларга шахсан ўзи бошчилик қилган ЙҲХБ раҳбарига миннатдорлик билдирди.
Изоҳ (0)