Иштихонда сингил йигити билан ишқий муносабатда бўлган опасини пичоқлаб ўлдирди

Самарқанд вилояти Иштихон туманида мудҳиш қотиллик содир этилди. Бу ҳақда Бош прокуратура матбуот хизмати «Дарё»га хабар берди.

Иштихон туманидаги «Дўстлик» маҳалласидан оқиб ўтувчи «Сайноқ» каналидан 25 декабрь, чоршанба куни мурда топилган. Аниқланишича, мурда 1998 йилда туғилган Анора (исми ўзгартирилган)га тегишли бўлиб, у ўз синглиси, 2001 йилда туғилган Барно (исми ўзгартирилган) томонидан ўлдирилиб, жиноятини яшириш мақсадида каналга оқизиб юборилган.

Воқеа 23 декабрь, душанба куни соат 21:30 ларда опа-сингил бирга ўтириб, спиртли ичимликлар истеъмол қилишдан бошланган. Барно йигити опаси Анора билан ишқий муносабатда бўлганини билиб қолганини айтиб жанжал кўтарган. Жанжал давомида Барно ошхона пичоғи билан опаси Аноранинг бўйин ва қорин соҳаларига бир неча маротаба уриб, уни қасддан ўлдирган. Жиноятини яшириш мақсадида эса опасининг мурдасини «Сайноқ» каналига оқизиб юборган.

Мазкур ҳолат юзасидан 25 декабрда шаҳар прокуратураси томонидан Жиноят кодексининг 97-моддаси (қасддан одам ўлдириш) 1-қисми билан жиноят иши қўзғатилиб, қотил сингил қўлга олинган.