Ўзбекистонда 2 мингта мактаб ичимлик суви билан таъминланмаган, 300 дан ортиқ боғча ўтинда овқат тайёрлайди

Ўзбекистон бўйича 2048 та мактаб ичимлик суви билан таъминланмаган. Бу ҳақда Олий Мажлис Сенати Кенгашининг 24 декабрь куни бўлиб ўтган кенгайтирилган йиғилишида маълум қилинди, дея хабар бермоқда «Дарё» мухбири Мусулмонбек Иброҳимов.

Маълум қилинишича, Андижон вилоятида мавжуд мактабларнинг 55 фоизи (406 та) ичимлик суви таъминотига уланган бўлса-да, носозликлар туфайли тармоқ ишламайди. Самарқанд вилоятининг 165 та, Тошкент вилоятининг 117 та мактабида ичимлик суви ташиб келтирилмоқда.

Мамлакат бўйича 1 533 та болалар боғчасида ичимлик суви ташиб келтирилади. Самарқанд вилоятида 308 та, Фарғона вилоятида 231 та, Бухоро вилоятида 211 та, Наманган вилоятида 197 та ва Қашқадарёда 170 та боғчада сув учун катта ҳажмли гигиеник сув идишлари ўрнатилмаган.

Бундан ташқари, 343 та боғчада овқат тайёрлаш учун ёқилғи тури сифатида ўтиндан фойдаланиб келинмоқда. Бу ҳолат Андижон вилоятида 113 та, Фарғона вилоятида 107 та, Наманган вилоятида 41 та ва Самарқанд вилоятида 33 та мактабгача таълим ташкилотида мавжуд.

Қайд этилишича, Ўзбекистондаги 5 854 та давлат боғчаларида ошхоналарнинг моддий-техник ҳолатини яхшилаш учун 391 миллиард сўм маблағ талаб этилади.