Филиппиннинг Ризал шаҳрида кокос виноси истеъмол қилиш оқибатида 8 киши вафот этди. «Korrespondent.net»нинг ёзишича, яна 300 киши ушбу спиртли ичимликдан заҳарланиб, ошқозон оғриши билан касалхонага ётқизилди.
Полиция маълумотларига кўра, уларнинг барчаси бир хил вино истеъмол қилган. Маҳаллий ҳукумат бу ўлкада, айниқса, Рождество байрамларида талаб катта бўлган норасмий тарқатилувчи ушбу ичимлик сотилишига тақиқ қўйди. Винодан заҳарланганлар сони ортмаслиги учун шундай чора кўрилган.
Қайд этилишича, юзлаб заҳарланган беморларга ёрдам кўрсатиш учун кўплаб шифокорлар меҳнат таътилидан касалхонага қайтарилган. Шифокорлардан бирининг айтишича, шаробни кокос ёнғоғидан нотўғри ферментлаш туфайли ортиқча миқдордаги метанол — заҳарли алкогол пайдо бўлиши, уни истеъмол қилиш кўрликка ва ҳатто ўлимга олиб келади.
Шунингдек, ўтган йилда ҳам 10 дан ортиқ киши кокос виноси истеъмол қилишдан вафот этгани айтилмоқда. Уларнинг таркибида ҳам юқори даражада метанол борилиги аниқланган.
Изоҳ (0)