Ўзбекистондан Чимкентга катта ҳажмда нолегал маҳсулот кириб келмоқда. Бу ҳақда Қозоғистондаги мазкур шаҳар тадбиркорлар палатаси ва маҳаллий ишбилармонлар маълум қилди, дея хабар беради «Литер.кз».
Чимкентдаги «Алтин адам» фабрикаси таъсисчилари шахсан ўрганиш ўтказиб, Ўзбекистондан Қозоғистонга кунига қарийб 10 минг комплект костюм ноқонуний олиб кирилишини аниқлади.
Маҳсулотнинг бир қисми кейинчалик бу ердан Россияга юборилади. Битта костюмнинг ўртача нархи 30 долларга тенг. Костюмларнинг нолегал олиб кирилиши йиллик айланмаси 100 миллион доллардан ошиқни ташкил этиши мумкин.
Қозоғистон давлат даромадлари қўмитаси расмий маълумотларига кўра эса 2018 йил давомида Ўзбекистондан Қозоғистонга жами 1,86 миллион долларлик 8,5 миллион дона эркак ва аёллар костюми, шими ва юбкаси келтирилган.
Таққослаш учун, йилига 120 минг дона костюм ишлаб чиқариш қувватига эга «Алтин адам» фабрикасида йиллик сотувлар ҳажми 20 мингтадан ошмаяпти.
Чимкент тадбиркорлар палатаси мутахассислари нолегал товар Қозоғистонга қандай ўтаётганини аниқлаш учун махфий мижоз ролини бажаришди. Бу жараёнда яширин импорт мамлакатга постлар оралаб эмас, чегарачилар ва божхоначилар кўз ўнгида кириб келиши маълум бўлди.
Товар чегарадан қуйидаги схема асосида ўтиб келади: ўзбек томонида машиналар юкини туширади, юк ташувчилар уларни тележкада чегарадан қўл юки сифатида олиб ўтади ва Қозоғистон ҳудудида бошқа машинага юклайди. Шу тариқа чегарадан нафақат текстиль, балки қурилиш материаллари, қуруқ мевалар, халқ истеъмоли моллари, кондитер маҳсулотлари олиб ўтилади.
«Кўплаб маҳаллий тикувчилик корхоналари рақобатга дош беролмай, ўз ишларини Ўзбекистондаги корхоналарга аутсорсингга беришга мажбур бўлмоқда. Бу эса қўшни давлатда тикувчилик билан боғлиқ ишлаб чиқариш кескин кўпайишига олиб келди. Биргина Наманган вилоятининг ўзида уларнинг сони 50 тадан 100 тага етди. Кондитер маҳсулотлари ишлаб чиқариш соҳасида ҳам худди шундай бўлмоқда», — дейди Чимкент тадбиркорлар палатаси директори Нурлан Кабицҳаев.
Изоҳ (0)