Тошкентдаги «Юнусобод» метро йўлининг давомини қуриш билан шуғулланаётган «Ўзбекистон темир йўллари» компанияси раиси Ҳуснитдин Ҳосилов барча ходимлар ва шахсан ўз номидан 18 декабрь куни юз берган тупроқ кўчиши оқибатида ҳалок бўлган ишчиларнинг қариндошларига ҳамдардлик билдирди. Сўнгги маълумотларга кўра, олти кишининг жасади тупроқ остидан олиб чиқилган.
«Ўрнини тўлдириб бўлмас йўқотиш сабаб қалбим қайғу ва дардга тўла. Бу йигитлар ўз яқинлари учун кўплаб яхшиликлар қилган ҳақиқий қаҳрамонлар сифатида абадий хотирамизда қолади», — дея раиснинг сўзларидан иқтибос келтирмоқда компания матбуот хизмати.
«Инсон ҳаёти бебаҳо ва ўз яқинини йўқотган оилалар учун ҳеч нарса марҳумларнинг ўрнини тўлиқ тўлдира олмайди. Биз фожиали ҳалок бўлган йигитлар оилаларининг муносиб турмуши учун қўлимиздан келган барча чораларни ишга солишга ўз номимдан ваъда бераман», — дея қўшимча қилган Ҳуснитдин Ҳосилов.
Қайд этилишича, 19 декабрь куни «Юнусобод» метро йўлининг янги қурилаётган қисмида содир бўлган тупроқ кўчиши сабаблари ва оқибатларини ўрганиш бўйича ҳукумат комиссияси ўз яқинини йўқотган ҳар бир оилага 100 миллион сўмдан ажратиш ҳақида топшириқ берган ва бу пуллар марҳумларнинг оила аъзоларига топширилган.
«Жаноза ва дафн маросимларини ташкил этишда ҳар томонлама кўмак кўрсатиш бўйича ҳам топшириқ берилди», — дейилади «Ўзбекистон темир йўллари» ахборотида. Маълумот учун, ушбу фожиали ҳодиса муносабати билан Бош прокуратура томонидан жиноят иши қўзғатилган.
Изоҳ (0)